SI MAYOR Edgardo Labella nag-una na og padali sa mga transaksyon sa Cebu City Government, pipila ka semana sa wala pa ang State of the City Address (Sona) ni Presidente Rodrigo Duterte.
Si Labella kinsa napili nga national chairman sa League of Cities of the Philippines nagkanayon nga atol sa tigom nga gipatawag ni Duterte sa tanang mayor ug gobernador sa Pilipinas, gipahimug-atan niini ang pagpaspas sa transaksyon labi na sa business permit, building permit ug ubang gikinahanglan para sa negusyo.
Atol sa pagpamulong ni Duterte atubangan sa kapin o kulang 1,500 ka mga local chief executive, subli niini nga gipahimug-atan ang gubat batok sa illegal nga druga, krimen, korapsyon, paghawan sa karsada ug dali nga pag-release sa business documents.
“I am glad to note that our case here in Cebu City , we have started implementing that. We have released a building permit in three days time to the Vista Venture Inc. The application of building permit was gathered during the previous administration for more than one year year. I think we were able to heed the call of the president and we will continue to ease in doing business,” padayag ni Labella.
Kabahin sa mando ni Duterte nga ipasuspenso ang mga mayor nga dili makahawannsa obstruction sa karsada ang mga mayor, si Labella nagkanayon nga pagsugod palang niya og lingkod gipahingusgan na niya kini.
Kini sama sa pag-abli og balik sa ML Quezon nga nagsubay sa Unit 1,2 ug 3 ug paglimpyo sa obstruction sa kinatibuk-ang Carbon complex gikan sa mga vendors nga nisulod na sa karsada.
Dugang sa mayor nga sa mosunod nga mga buwan, mahimo na unyang duha ka tuig ang pagbayad sa business permit sa higayon nga ma-amend na sa konseho ang tax code sa dakbayan.
Sa maong paagi, dili na mahasol ang mga negusyante sa pagbayad sa ilang buhisanan sa negusyo matag tuig ngadto sa siyudad. (PAC)