PORMAL nang gi-withdraw ni Gob. Gwendolyn Garcia ang petition for injunction nga una na niini gisang-at sa korte subay sa tinguhang pagpugong unta sa katukuran sa Cebu Resource Center Project (CRCP).
Ang iyang abogado nga si Marino Martinquilla niduso sa motion to withdraw the petition ngadto sa Regional Trial Court Branch 29 sa Toledo City niadtong Martes, Hulyo 23, 2019.
Gawas kang Garcia, lakip sa petitioners sa kaso si kanhi bokal ug karon Balamban Mayor Alex Binghay.
Kongresista pa sa 3rd district si Garcia dihang naduso ang petisyon niadtong Marso 26, 2019.
Base sa mosyon, dihang napili si Garcia isip gobernador sa Sugbo niadtong Mayo 13 ug dihang ni-asumir siya sa katungdanan niadtong udto sa Hunyo 30, siya na ang ni-exercise ug general supervision sa mga programa, mga proyekto, serbisyo ug mga kalihukan sa Kapitolyo ug maoy na’y nirepresentar sa provincial government sa mga opisyal ug business transactions niini ubos sa Local Government Code.
Subling gipadayag ni Martinquilla nga wala nay bili ang petisyon nga gisang-at ni Garcia kay siya na may gobernador ug wala na siyay planong ipadayon ang CRCP.
Gawas pa, wala na usab sa posisyon ang mga respondent sa kaso nga silang kanhi gobernador Hilario Davide III, kanhi bise gobernador Agnes Magpale ug kanhi Provincial Administrator Mark Tolentino.
Dugang ni Martinquilla, nihimo na usab ug manifestation sa korte ang Development Bank of the Philippines labot sa pagputol na niini sa loan agreement tali sa Kapitolyo. ANg DBP usa sag a respondened sa kaso.
“It being the case, the issues in the above-entitled case have already become moot and academic, as the acts sought to be enjoined, which is the construction and implementation of the subject 20-Storey Building with Basement Parking, known as “Cebu Resource Center, is now impossible and not achievable,” tipik sa motion to withdraw.
Husayon pa hinuon sa korte ang mosyon ug gitakda kini karong Biyernes, Hulyo 26, 2019.
Di pa hinuon makasiguro si Atty. Martinquilla kung hingpit nga uyonan sa korte ang motion to withdraw ni Garcia. Kini kay wala pa niduso ug pormal nga mga pleadings labot sa kaso ngadto sa korte ang WT Construction, nga lakip sa mga respondent.
“I don’t know if they would file an opposition but then para nako, dili na lang ko mo-preempt sa (decision) sa court. Sila (WT) na lang ang possible nga dunay opposition (sa motion to withdraw) but we would be ready with that opposition,” niingon si Martinquilla
Sa nasayran, pabiling wala mosanong ang WT Construction sa ultimatum nga gihatag ni Gob. Garcia kanila pag-abuno ug balik sa gikubkob nila nga dapit, diin unta tukoron ang CRCP. (AZLG)