‘Kawatan’ og motor nasikop

KARNAP: Si Diovic Bernal, taga Brgy. Day-as, Dakbayan sa Sugbo nadakpan sa kapulisan sa Dakbayan sa Mandaue tungod sa mga CCTV footage sa mga pagpangawat sa motorsiklo diin nitakdo ang bayhon ug panagway niya sa kawatan nga namiktima sa mga tag-iya og motorsiklo. Giawhag sa kapulisan ang mga tag-iya og motorsiklo sa pagduaw sa Mandaue City Police Office, apan magdala og mga dokumento sa ilang sakyanan. (Arvie N. Veloso)
KARNAP: Si Diovic Bernal, taga Brgy. Day-as, Dakbayan sa Sugbo nadakpan sa kapulisan sa Dakbayan sa Mandaue tungod sa mga CCTV footage sa mga pagpangawat sa motorsiklo diin nitakdo ang bayhon ug panagway niya sa kawatan nga namiktima sa mga tag-iya og motorsiklo. Giawhag sa kapulisan ang mga tag-iya og motorsiklo sa pagduaw sa Mandaue City Police Office, apan magdala og mga dokumento sa ilang sakyanan. (Arvie N. Veloso)

GITUDLO nga responsable sa pagpangawat og mga motorsiklo sa Sugbo nasikop sa kapulisan sa Dakbayan sa Mandaue niadtong Hulyo 23, 2019 sa gabii.

Natanggong sa Police Station 1 sa Mandaue City Police Office si Diovic Bernal, 40, taga Jakosalem St., Brgy. Day-as, Siyudad sa Sugbo.

Unang nasikop si Bernal sa kasong paggamit ug illegal nga drugas ug illegal nga paghupot og armas.

Nakapyansa si Bernal ug nangayo pa og pasaylo sa kapulisan.

Gibilin pa niini ang iyang contact number pagpakita nga mag-usab na siya.

Niangkon hinuon si Bernal nga sobra na sa 10 ka mga motorsiklo ang iyang nakawat sulod sa unom ka buwan.

Human niya kini kawaton, ipamaligya dayon niya sa mga mopalit og P5,000.

“Daghan na. Wa ko kahibaw pila. Amo mana kuhaon nya ibaligya gud, buy and sell ba tag P5,000,” matod ni Bernal sa Superbalita Cebu.

Atol sa operasyon sa kapulisan, unom ka mga motorsiklo ang ilang nabawi sa managlahing mga dapit.

Unang nabantayan sa kapulisan ang suspek pinaagi sa CCTV footage sa usa ka establisimento duol sa buwangan ingon man sa command center sa dakbayan sa Mandaue.

Sigon sa Hepe sa Police Station 1, Police Major Aldrin Villacampa, gisuwayan nila pag contact ang suspek human sila makadawat og reklamo sa usa sa mga biktima sa carnap.

“Amo to siya gisuwayan og tawag, katong niagi, nakit-an namo siya sa Palace of Justice nya gipatawag nako sa akong kauban, nya wa man moduol, mao to contact na namo siya nga ali diri kay naa koy ipabuhat nimo. Nya nianhi man, mao to giposasan na namo nya nitug-an man sad siya,” asoy ni Villacampa.

Giingong sagad sa mga lugar nga iyang biktimahon ug baligyaan sa Brgy. Dumlog, dakbayan sa Talisay, Mandaue, Consolacion, Day-as ug Carbon.

Alang sa mga nabiktima, dalha lang ang mga dokumento sa maong mga motor diha sa Police Station 1 diha sa A. Soriano Ave., Corner Ouano Wharf, Brgy. Centro sa dakbayan sa Mandaue aron makuha ang motorsiklo.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph