SAMOT nga maguol ang mga tawo nga mi-invest sa Kapa Community Ministry International Inc., pinaagi sa pagdonar gumikan ning kasamtangan human ang Department of Justice (DOJ) nagmugna og mga panel of prosecutors aron motutok sa reklamo nga gihikay sa National Bureau of Investigation (NBI).
Ang plano nagtumbok sa pagpangita ug pagdakop kang Kapa founder pastor Joel Apolinario ug sa lain pang 13 ka mga opisyal niini aron patubagon sa reklamo ug aron mauli ang kuwarta ngadto sa mga investors.
Apan alang kang Lucia Martinez nga taga Barangay San Antonio sa Agdao District, Davao City nga nahinabi sa Superbalita Davao, nga dili na angay maningil ang mga investors sa ilang salapi gumikan gi-donate kini nila ug walay balaod nga mosupak diha sa donation.
“Donation na, buot pasabot gihatag na ngadto sa simbahan nga gidala ni Apolinario, donation ang nakabutang, dili investment, diha matumba ang paglaum niini mga tawo nga nag-donate, unya lahi ang hunahuna, kay abi nila og nabutang sila og kuwarta sa Kapa nga motubo, pero donation kana,” pagpasabot ni Lucia, 54-anyos.
Sa gipagulang mando ni Prosecutor General Benedicto Malcontento, gipili niini ang lima ka mga prosecutor aron maglusad og preliminary investigation batok sa Kapa diin pangulohan kini ni Assistant State Prosecutor (ASP) Ma. Lourdes Uy samtang magsilbing miyembro sila ASP Consuelo Corazon Pazzluagan, Xerxes Garcia, Jeanette Dacpano ug Assistant Prosecutor Atty. Luis Miguel Flores.
Subay niini, nagmando usab si Malcontento sa pagsumite sa mga dokumento sa gimugnang panel labot sa lima ka ihap sa paglapas sa Sec. 8 ug 26 sa Securities Regulations Code ingon man walo ka ihap sa kalapasan sa Art. 315 sa Revise Penal Code kun syndicated estafa.
Gilauman ang gilayong pagpagula og subpoena sa maong panel ngadto sa mga respondents.
Ning kasamtangan daghan ang mga nagmahay, apan alang nila ibutang na lang nila isip ilang kasinatian ug nakat-on sila kanus-a moundang.
“Charged na lang to siya sa experience, wala na ta’y mahimo, wala naman gyud, bisan unsaon pa, at least nakabalo ta kung kanus-a ta mohunong, aron di na kita mabiktima,” ni Arnold (nagpatago sa apilyedo), 45-anyos, taga Barangay Matina Aplaya, Davao City, kinsa mi-donate sab sa Kapa. (Jeepy P. Compio/dxDC RMN Davao)