MAS gipahugtan pa ang seguridad sa Davao City nunot sa umaabot nga week-long celebration sa ika-34th Kadayawan sa Dabaw, matud ni Davao City Police Office (DCPO) spokesperson Ma. Theresita Plaza-Gaspan, Miyerkules sa buntag, Hulyo 24.
Gisulti ni Police Captain Gaspan atol sa AFP-PNP Press Conference Miyerkules nga dunay mokabat 3,000 ka mga pulis ang ipakatag sa tibuok siyudad sa Davao una magsugod ang mga programa sa unang semana sa Agosto.
Agosto, 17 matigayon ang Indak-Indak sa Kadalanan, samtang pagka Agosto 24, matigayon ang Pamulak sa Kadayawan.
“Since week-long gyud ang celebration, labi na kay nausab ang petsa, sa Floral Float Parade, moabot sa August 24, so ning first week pa lang sa Agosto gimuntar na ang security forces sa kapulisan apil na ang mga force multipliers nato,” ingon ni Gaspan.
Gawas sa mokabat 3,000 ka mga pulis, gipuwersa sab ang dul-an 1,000 ka mga auxiliary police gikan sa dose ka mga istasyon sa kapulisan sa DCPO, 200 ka uniformed personnel gikan Police Regional Office (PRO)-Davao ug dugang puwersa sa pulis gikan sa nagkadaiyang probinsiya.
Gawas niini, duna say security personnel gikan sa Task Force (TF) Davao, volunteer police auxiliary, force multiplier, ug uban pang law enforcement nga ahensiya.
“Ssecurity measures [are] still tight. Wala ta nag downgrade sa atoang alert level,” dugang pa niya.
Hugot sab ang inspeksyon sa tulo ka mga checkpoint sa TF-Davao sa Baragany Sirawan, Toril Davao City, Brgy. Lacson, Calinan District ug sa Baragany Licanan sa Bunawan District.
Usa-usa sab nga gipang-utingkay ang sud sa mga bag sa mga pasahero una sila hingpit nga makasulod sa Davao City.
Nagsubay sab sa kadagatan ang Regional Maritime Office sa Police Regional Office-Davao uban sa Philippine Coast Guard ug sa Naval Forces sa Eastern Mindanao Command aron mabantayan ang kadagatan sa mga tawo nga dunay dautang tinguha.
Mipahigayon sab og aerial surveillance ang Task Force Haribon sa Eastmincom aron maseguro nga walay mga dautang tawo sa palibot samtang nagpadayon ang mga aktibidad.
Nakatutok sab ang atensiyon sa Special Weapons and Tactics sa PRO-Davao Region sa sentrong bahin sa dakbayan kon asa matigayon ang sentro sa kaugdahan sa ika-34th Kadayawan sa Dabaw.
Naghangyo ang awtoridad nga mosunod sa mga regulasyon nga gipatuman aron di unya malangan sa paghiling diha sa pagsulod sa mga lugar asa ipahigayon ang programa.