LINGAW ug puno sa kasadya ang selebrasyon sa ika 59th ka adlawng natawhan sa Gingoog City. Kini tungod sa mas gipalapdan, gipalambo ug gipanindot nga mga kalihokan sa ika 40th Kaliga Festival kon asa usa kini ka semana nga selebrasyon diin dinhi gipakita ang nagkalain laing aktibidades.
Kini gilangkoban sa 25th Kaliga Climb:
* Banta-awan Lake
* Kaliga Ikapito
* Foam party sa Pahayahay sa Pantalan
* 1st Gingoog City Mural Painting contest sa Don Restituto Baol Central School
* Fantasy Float Parade
* 1st Gingoog Trail Run Challenge
* Singampu Rituals
* Grand Kaliga Street Dancing Parade and Tableau
* Kaliga Drag Race
* 1st Open Motocross Competition
* The Voice of East MisOr Musicale
* GCEC Fun Run
* Race to Summit 25 Km Uphill MTB Roadbike Challenge
* Bb. Gingoog night
* Gingoog City Agro Fair
* Civic Military Parade
* Coronation night sa Bb. Gingoog Tourism
* Pamukaw sa Kaliga
* Mayor Erick Canosa Tennis Cup
* Mass Blood Donation nga himoon sa Rizal Park
Usa sa labing highlight sa selebrasyon mao ang Grand Kaliga Street Dancing Parade and Tableau nga gitambongan sa SunStar Superbalita Cagayan de Oro kon asa walo ka contingents gikan sa nagkalain-laing tunghaan sa siyudad ug kasikbit nga dapit nakigtigi aron makab-ot ang titulo ug mabitbit ang kantidad nga P250,000.
Ang Magsaysay College sa lungsod sa Magsaysay Misamis Oriental maoy mikampiyon kon asa naangkon sab nila ang titulong Most Lively Contingent ug Best in Costume, tropeyo ug ang cash nga P250,000.
Ikaduhang pwesto mao ang Gingoog City Christian College nga nakakuha og P150,000 nga cash ug ikatulong pwesto ang LGU Medina nga nag-uli og P100,000 nga premyo. Wala sab magmahay ang wala nakaharbat og titulo human miuli bitbit og P70,000 isip consolation prize.
Matud ni Mayor Erick Cañosa nga usa gyod sa labing highlight sa kalihokan tungod kay sila ang bag-ong administrasyon nga gipamunoan sa kanhing administrasyon sa halos 15 ka tuig.
Gibutyag niini nga wala siyay gibag-o sa mga naandan nga plano ug programa sa kanhi administrasyon apan mas gipagwapo ug gipangdugangan. Taliwala sa giingong kagamay lamang sa panahon human sa eleksyon nahimo ang mga aktibidades nga masadyaon. Kinatibuk-an nga budget niini moabot og P1.7 milyon nga giingon niining nakaya bisan sa limitado nga preparasyon.
"Ang Kaliga Festival mao kini atong gihimo nga selebrasyon every year. This is one way that we can showcase sa atong native ug mga ancestral nga Higaunon Tribe. Kini usa ka paagi nga mapakita nato kon unsa man ang Gingoog. It is a City of Goodluck and a City of Waterfalls. Makita nato ang nagkalain lain nga sayaw like, for example, sa mga animals nga makita nato sa kalasangan ug mga suba sa kabukiran. Pagpakita sa harvest sa atong uma sa kabukiran isip pagpasalamat kini sa atong apohan nga gikan sa kabukiran," matud ni Cañosa.
Lakip sab sa highlight ang Binibining Gingoog Tourism kon asa gipasalig ni Cañosa nga ang ilang mananaog mahimong labing unang representante sa Miss Kuyamis 2020.
"Definitely, we will cooperate and participate sa Kuyamis Festival. That is also one way that we can promote Gingoog since daghan sab maanyag nga lumulopyo sa dakbayan, so we will support them para ma promote atong siyudad," matud ni Cañosa, kinsi miingon nga iyang pangandoy nga maila ang siyudad nga City of Goodluck and Waterfalls kon asa adunay 30 ka mga waterfalls.