USA ka rebel returnee ug laing usa ka lalaki ang gipamusil sa gituohang sakop sa New People's Army (NPA) atubangan sa usa ka dakong buwangan sa Arellano Street, Barangay Poblacion, Zamboanguita, Negros Oriental alas 4:30 sa hapon, Miyerkules, Hulyo 24, 2019 .
Ang mga biktima mao silang Weny Alegre y Encilay (rebel returnee), 37, mag-uuma nga taga Barangay Calango, Zamboanguita, Negros Oriental ug Felimino Janayan y Elvinia, taga Brgy Calango, Zamboanguita, Negros Oriental, diin siya ang presidente sa United Calango Farmers Association.
Nakuha sa crime scene ang 11 ka basiyo sa bala sa kalibre .45 ug duha ka basiyo sa 9mm samtang duha ka kabhang sa wala matino nga kalibre sa armas.
Sa imbestigasyon sa kapulisan nasuta nga sigun sa mga saksi sa dapit nga gikan sa sulod sa sabongan ang mga biktima apan kalit lang sila nga gipamusil sa upat ka mga armadong lalaki.
Gituohan sa kapulisan nga sakop sa Sparu Unit sa NPA ang upat ka suspek tungod kay human sa pagpamusil misinggit kini og "mabuhi ang NPA" dayong sibat pahilayo sa maong dapit.
Wala mailhi ang mga armado tungod naka-face mask kini sakay sa duha ka scooters nga kolor kahil ug dalag.
Si Alegre kanhi NPA kumander nga naglihok sa Negros Oriental apan mitahan sa iyang kaugalingon sa gobyerno gani nahimong forest guard sa Provincial Environment and Natural Resources Office sa probinsya sa Negros Oriental. (Superbalita Cebu)