HINDANG, Leyte -- Usa ang patay, usa ang samdan ug laing usa nadakpan sa managlahi nga anti-illegal drugs operations sa Eastern Visayas, Miyekules, Hulyo 24, 2019.
Unang operasyon gilusad sa Philippine Drug Enforcement Agency (Pdea) Eastern Visayas ni Agent Cleveland Villamor, Leyte Provincial Drug Enforcement Group ni Police Major Maturino Diaz, Regional Drug Enforcement Group ni Police Lieutenant Harry Sucayre ug Philippine Army Captain Kervin Jay Latoza sa Barangay Tagbibi, Hindang Leyte.
Tuyo sa maong operasyon sila si Joel Jundis, 41, taga Hilongos Leyte ug ang 16-anyos nga gitago sa pangan nga Juday, taga Bato, Leyte.
Matud sa awtoridad, level 2 high-value target sa Hilongos police si Jundis samtang naa sab sa watchlist sa Hindang Police si Juday.
Taud-taod gipanid-an sa mga awtoridad ang mga suspek sa ilegal nga kalihukan.
Busa, alas 4:10 sa hapon sa maong adlaw, usa ka poseur buyer sa Pdea ang nipalit kang Joel.
Nitunol kini og usa ka pakete nga shabu baylo sa marked money nga P500.
Matod sa report sa kapulisan, nakabantay ang suspek nga niabot na ang mga operatiba busa nibunot kini sa iyang armas ug namusil sa makatulo nga higayon sa mga operatiba.
Nibawos ang mga operatiba agi'g panalipod hinungdan nga napatay diha diha ang suspek.
Sa pagsusi sa taga Scene of the Crime Operatives, nakuha sa crime scene ang unom ka dagkong pakete sa gituhoang shabu nga mobalor og P200,000, marked money nga P500, kalibre .38 nga revolver nga dunay 1 ka bala ug laing basiyo sa kalibre .45.
Ang dinakpan nga si Juday naa una sa kustodiya sa Hindang Police Station ug gikatakda nga i-turnover sa Department of Social Welfare and Development.
Sa samang adlaw, sa Maasin City sa Southern Leyte, napusilan usab sa mga awtoridad ang usa ka drug personality.
Ang buy-bust operation gipahigayon sa Barangay Combado, Maasin City, alas 7:20 sa gabii.
Tuyo sa operasyon mao ang suspek nga si Robert Garcia, 38, wala'y trabaho, taga San Isidro, St. Bernard, Southern Leyte.
Napalitan sa usa ka poseur buyer si Garcia og napulo ka pakete sa gituhoang shabu nga nagkantidad og P10,000.
Matud sa kapulisan, nakabantay kini nga pulis ang ka transaksyon busa nibunot kini sa armas ug una nga namusil sa kapulisan.
Nibawos ang mga operatiba ngadto sa suspek ug naigo kini apan gidala sa tambalanan.
Nakuha usab sa iyang posisyon ang unom ka pakete sa gituhoang shabu, usa ka kalibre .357 ug pipila ka bala ug mga basiyo, cellphone ug uban pang gamit. (Superbalita Cebu)