SA UNSANG pagka unsaa, kalit lang nabali ang huros sa hangin ug napagan ang pagbisita unta sa Cebu sa bag-ong tandem ni Kathryn Bernardo ug Alden Richards, mga bida sa Hello, Love, Goodbye nga hinimo sa Star Cinema.
Sa mga naghulat sa pagbisita ug nabawo ning bag-ong kalambuan, motan-aw na lang ta sa pelikula karong Miyerkules, Hulyo 31, aron masuta kon pareson ba sila.
•••
Usa diay ka pelikula (di teleserye) ang Family History nga gibidahan nila ni Michael V ug Dawn Zulueta. Sa pakig-istorya namo ni Michael ug Mikoy Morales, among nahibaw-an nga gawas nga bida, si Michael usab ang nisulat sa istorya, direktor ug co-producer (Mic Test Entertainment) uban ang GMA Pictures.
Ang Family History nga mahitungod sa mga mithi sa kinabuhi, kaminyoon ug gugma gisalida sugod niadtong Miyerkules.
•••
Dako ang pagduda sa mga kauban nakong taga media nga gawas sa panagpares nila sa GMA teleserye nga The Better Woman, may labaw pang kasuod si Andrea Torres ug Derek Ramsay sa luyo sa camera.
Mga ginagmayng lihok sama sa hapuhap sa abaga, likod ug kilid ug uban pa ang nakapaduda namo nga nagtan-aw. Morag wa say pagtutol ang mama ni Andrea (nikuyog sa Cebu) kon matinuod man ang duda.
Ang The Better Woman nagsunod sa Sahaya sa Kapuso primetime.
•••
Alegre ang presscon uban ni Katrina Halili ug Wendell Ramos sa umaabot nga GMA Afternoon Prime series nga Prima Donnas. Human sa ubay-ubay nga pagka kontrabida, buotan si Katrina (Lilian) dinhi, nga mahimong inahan sa mga anak ni Wendell (Jaime) kay di makaanak ang asawa (Glaiza de Castro) niini.
Kontrabida dinhi si Aiko Melendez. Si Gina Alajar ang direktor.
•••
Ang bag-ong indigay sa kaanyag sa mga minyo nga babaye, Mrs. Cebu-Philippines 2019, magpahigayon sa Talents Night, Media Presentation ug Conference ugma sa Pagcor Teatro Casino sa alas 5 s.h.
Labing menos duha ka mga amiga ang niapil ning maong bangga. Dugang detalye sa sunod higayon.
•••
Ipahigayon ang grand finals sa Visayan Music Awards ugma sa gabii didto sa Oakridge Business Park sa A.S. Fortuna St. sa Mandaue City.