GIPAHIBAWO ni Presidente Rodrigo Duterte atul sa iyang State of the Nation Address (SONA) nga maoy nag-abli sa 18th congress niadtong Lunes, Hulyo 22, mao ang pag-uswag sa barangay ug Sangguniang Kabataan (SK) election nga gikatakda unta karong sunod tuig ngadto na sa Oktubre 2022. Buot usab sa presidente nga mapasar ang Magna Carta for Barangays. Gikalipay kini sa mga naglingkud nga mga opisyal sa barangay apan nasubo ang mga nagpreparar na unta nga modagan sa barangay ug SK election. Daghan nang nagsuroysuroy aron pagpa-ila sa ilang kaugalingon kay modagan lagi unta sa barangay election sunod tuig. Apan kining gipahibawo sa presidente mao lamang ang nagkumpirmar sa gisaad ni Senador Bong Go panahun sa kampanya. Gani daghang mga opisyal sa barangay ang mibutar kaniya tungod niining mao niyang saad sa pag-uswag sa piniliay sa barangay ug SK. Hinaut pang kining maong kaugmaran maoy makahatag sa mga opsiyal sa barangay og dugang panahun aron pagserbisyo alang pag-ugmad sa ilang tagsa-tagsa ka mga dapit. Ato usab nga hangyuon ang mga nabawo nga mga mokandidato nga motabang usa sa mga kalihukan sa barangay samtang layo pa ang election.
•••
Dili pa lang dugay nakita nato sa telebisyun nga dihay smuggled nga mga sakyanan nga gidugmok apil na ang Ferrari nga mobalor gikan sa $200,000 kun P10,200,000 hangtud sa kinamahalan nga mobalor og $2 million kun P102 million ang usa. Apan didto kini sa kaulohan nahitabo ang pagdugmok dili dinhi sa Sugbo. Duna man gud koy nadawat nga impormasyon nga adunay unom ka vans nga gipugngan pa sa Customs sa Port of Cebu nga gituhoang dunay sud nga mahalong mga sakyanan apil na ang Ferrari, Rolls-Royce, Mercedes Benz ug Lamborghini. Kon tinuod kini nganong dugay man kining gi-ablihan aron sad unta dugmokun sama sa gihimo didto sa kaulohan. Maghuwat pa ba kini sila og hunghong gikan sa mga gamhanan? Apil usab nga gipahibawo ni Presidente Duterte nga iyang gibutang sa floating status ang 64 ka mga sakop sa Bureau of Customs tungod sa kalambigitan niini sa kurapsiyon. Gusto niyang pasakaan kini sila og kaso sa Office of the Ombudsman.
Atul gihapon sa maong SONA giawhag ni Duterte ang kongreso sa pagpasar ug balaud nga magtukod sa Department of Overseas Filipino Workers (OFW) sa dili pa ang Disyembre karong tuiga aron maprotektahan ang mga OFW. Daw dili na interesado si Duterte sa pag-usab sa atong gobiyerno ngadto sa Federal-Parliamentary pinaagi sa charter change tungod kay wa na kini niya hisguti sa SONA. Ang dugay na hinuon kaayo niyang gipangayo mao ang pagbalik sa death penalty alang sa mga krimen may kalabutan sa iligal nga drugas ug plunder. Mao kini ang kontrobersiyal niyang gipangayo sa kongreso kay dunay mga kongresista ug senador nga dili uyon sa pagbalik niini. Supak usab niini ang Vatican ug kaparian. Apan gituhoan nga molusot gihapon kini tungod kay daghang kaalyadong kongresista ug senador ang presidente. (mannyrabacal1144@gmail.com)