KANIADTO, ginagmay rang mga pakete sa shabu ang masakmit sa kapulisan gikan sa mga ginagmay nga mga pusher. Busa kon dunay mapatay nga pusher sa kapulisan sa ilang mga operasyon, ingnon dayon nga ang mga ginagmay ray gidaginot.
Apan karon, kinilong shabu na ang nasakmit sa kapulisan. Sama sa nasakmit sa mga operatiba sa Criminal Investigation Branch sa Mandaue City Police Office sa usa ka giingong buy-bust operation niadtong Martes sa hapon didto sa Zuellig Avenue sa North Reclamation Area, Mandaue City.
Nasakmit nila ang 11 ka kilo nga shabu nga mobalor og kapin sa P74 milyones, usa ka .357 revolver, usa ka .45 pistol, usa KG9 submachine gun ug usa ka multicab nga gigamit sa tulo ka suspetsado.
•••
Tulo ka mga tawo ang napatay atol sa maong operasyon. Ug sama sa nag-unang mga operasyon, ang estorya mao lang gihapon. Matod pa ni Mandaue Police Director Jonathan Abella, ang mga suspetsado nakabantay nga pulis ang ilang gikatransaksyon ug maoy unang mibunot sa ilang mga pusil ug mipabuto.
Siyempre, mibawos ang mga pulis ug napatay ang tulo. Kini dali rang matubag kon ipaagi sa paraffin test ang mga napatay ug makita nga positibo sila sa gunpowder burns ug sa ato pa, nakapabuto sa ilang mga pusil.
Ang lisod ug di pa matubag sa kapulisan mao nga diin gikan ang ingon niana kadaghan nga shabu. Tiaw mo bay 11 ka kilo nga mobalor og kapin sa P74 milyones. Kay napatay man ang mga suspetsado, wa nay mapangutana.
•••
Sa tulo nga napatay, usa pa ang nailhan sa pagsuwat nato niini. Siya mao si Prince Gem Mapalo, 21, ang drayber sa multicab. Ang laing duha wa pa mailhi. Kini unta silang tulo ang makatubag kon hain ang tinubdan sa ingon ana kadaghan nga shabu.
Si Abella niingon nga ilang gimonitor ang mga suspetsado sud sa kapin sa usa ka buwan subay sa testimoniya sa mga drug suspects nga ilang nangasikop. Ilang nasayran gikan niadtong nangasikop sa Mandaue nga ang ilang shabu gikan sa Cebu.
Mas maayo tingali nga ilakip sa ilang monitoring kon hain gyud ang tinubdan sa shabu.