LAING star player sa National Basketball Association (NBA) ang nakahukom nga dili na usab moduwa sa 2019 FIBA World Cup sa China.
Ang forward sa Cleveland Cavaliers maoy ikasiyam nga dekalidad nga player nga mi-withdraw sa iyang partisipasyon isip sakop sa Team USA.
Ang tinubdan nagbutyag sa The Athletic ug sa Cleveland.com kagahapon nga si Love mitawag na ngadto ni Team USA headcoach Gregg Popovich aron ipahibawo ang iyang desisiyon.
Sa orihinal unta niyang plano, si Love mosalmot sa USA Basketball training camp sa Las Vegas nga ipahigayon sa Agusto 5-8 diin didto pilian ang 12 ka mga players nga molangkob sa Team USA alang sa World Cup.
Ang pagbalibad ni Love nahitabo pipila lang ka adlaw gikataho nga si Damian Lillard mi-withdrew usab.
Sa niaging duha ka semana, ang mga star players nga nakadisisyon nga mopalabay usab sa World Cup karong tuiga naglakip nila ni James Harden, Anthony Davis, Eric Gordon, Zion Williamson ug CJ McCollum.
Ang 2019 World Cup mosugod sa Agusto 31 ngadto sa Septiyembre 15. Ang Team USA moduwa og exhibition games sa Australia sa dili pa kini mogikan paingon sa Asia.
Sa Augsto 17 ibutyag ang final lineup sa team ug ilang ikasangka sa Sept. 1 ang Czech Republic sa Shanghai. (JBM)