ALANG niadtong wa pa kataak sa Bangkok, Thailand usa sa labing gisuroy sa mga turista mao ang gitawag og “Bangkok’s Royal Residence” ang The Grand Palace.
Ang maong grandioso nga palasyo kanhi pinuy-anan sa mga Hari sa ilang nasud nga karon gihimo nang museum.
Tips
Apan sa dili pa ta magsugod sa pagpanuroy, dia koy pahibawo o pahinumdum alang niadtong mobiyahe.
Aron makadaginot sa inyong international trip, mas bintaha nga magpa-book sa inyong flight samtang layo pa ang biyahe pinaagi sa mga airline promo fare diin mga budget airline nag-offer.
Sa Mactan Cebu International Airport (MCIA) Terminal 2, molukat ka og Travel Tax balor og P1,600 ug ipakita sa airline company uban ang imong Philippine Passport ug boarding ticket.
Inig abot sa Immigration, ayaw karatol ug ihatag ang imong mga dokumento sa pagbiyahe nga maoy imong gihatag sa pag-check-in sa eroplano.
Tubaga ang pangutana sa Immigration Officer ug labing maayo mo-establish ka og eye-to-eye contact ug direkta ang imong tubag sa pangutana ug labaw sa tanan bawal ang pagpamakak para dili ma-offload.
Ang biyahe gikan sa MCIA molanat og dul-an upat ka oras sa dili pa motugpa ang abyon sa Bangkok International Airport nga usa sa labing dako nga airport sa Asya.
Inig gawas nimo sa tugpahanan, mamahimo kang mosakay og taxi, bus o train paingon sa imong destinasyon.
Dili mabalaka sa inyong accommodation kay sa Bangkok nagpasad ang mga baratuhon nga kapuy-an kansang kwarto sa pension house nagkantidad og kapin o kulang 500 Baht kun P800 sa atong kwarta.
Entrance Fee
Bugtong ang mga Thai national ra ang libre nga makasulod sa The Grand Palace pinaagi sa pagpakita sa ilang identification card.
Samtang sa mga foreigner gikinahanglan nga mobayad og 500 baht diin lakip na niini ang access ngadto sa Wat Phra Kaew ug Queen Sirikit Museum of Textile nga nahimutang sud sa complex.
Dress Code
Gidili kadtong mga turista nga makasud sul-ob og sando o sleeveless, mini skirt, shorts, gisi-gisi nga karsones, leggings ug see-through nga mga sinina ilabi na ang tsinelas.
Kon inyo kining matuman ubani ko ninyo niining atong pagpanuroy sa The Grand Palace, Bangkok.
Kasaysayan
Kon atong lili-on ang kasaysayan sa maong dapit, ang maong palasyo natukod atol sa pamunoan ni King Phutthayotfa Chulalok (Rama I) nga maoy founder sa Chakri Dynasty, ang nipahimo sa maong royal palace nga gisugdan sa pagtukod niadtong 1782 hangtod nahuman niadtong 1925.
Gawas sa royal ug throne halls diha sa complex nga adunay gilapdon nga 218,000 square meters, nahimutang sab ang government offices, samtang ang complex gilibutan sa 1,900 metros nga kutay sa paril. Niadtong 1925 wala na puy-i sa hari ang Grand Palace diin si King Bhumidol Adulyadej (Rama IX) ug ang iyang successor nga si King Vajiralongkorn (Rama X) didto na nipuyo sa Amphorn Sathan Residential Hall sa Dusit Palace apan ang ilang kanhi palasyo padayon nga gigamit sa ilang mga opisyal nga kalihukan.
Makita sab nimo ang Temple of Emerald Buddha, Outer Court, public buildings, middle court nga naglakip sa Phra Maha Prasat building ug Siwalai garden.
Ang ilang mga temple gituyokan og pure gold (leaf) apan way bisan usa niini ang gikawat sa mga turista.
Kon natapos na mo sa pagbinaktas diha sa complex aduna pay ubang mga suroyan duol sa maong lugar.
Chang Puak Farm
Gikan sa Bangkok proper, kon wala ka pa maluya sa The Grand Palace, sanglit ang ilang klima sa panahon susama ra sa Pilipinas, mahimo kang mobisita sa mga elepante nga nahimutang sa Damnoen Saduak nga nahimutang 135 kilometro gikan sa Bangkok.
Didto mahimo nimong masakyan ang elepante pinaagi sa pagbayad og 600 Baht kun P960 sulod sa kapin o kulang 15 minutos nga paglakaw sa hayop.
Anaa sab ang crocodile show nga adunay 400 Baht nga entrance fee samtang 700 Baht ang tiger (lion-tiger) show ug daghan pang uban.