PIKIT, North Cotabato -- Padayon karon ang gihimong imbestigasyon sa mga awtoridad sa bomba nga nibusikad ug nikalas og usa ka kinabuhi samtang niangol sa lain pang duha alas 3:30 sa kaadlawon Huwebes, Hulyo 25.
Gitug-an ni Pikit chief of police Captain Mautin Pangandigan nga kalit lang nga nibusikad ang giingong 60 mm mortar ug nitugpa sa balay sa mga biktima.
Namatay si Misba Masla samtang naangol sila Ali Masla ug anak niini nga si Edwin, mga nagpuyo sa Sitio Butilin, Brgy. Kabasalan sa maong lungsod.
Mga angol gihatud gilayon ngadto sa Cruzado Medical Hospital sa lungsod.
Nasayran nga sa wala pa nahitabo ang pagbusikad, nadungog sa mga molupyo sa dapit ang sunod-sunod nga buto sa mga armas ug mortar.
Gisundan kini sa airstrike sa duha ka Agusta Chopper sa Philippine Air Force sa utlanan sa Pikit ug Datu Piang, Maguindanao Province.
Giingong naglusad og surgical strike ang militar batok sa grupo ni Shiek Esmail Abdulmalik, alyas Kumander Abu Toraife sa BIFF-ISIS Inspired Group kagahapon sa kaadlawon. (Edgar E. Fuerzas)