GIAMENDAHAN na sa Konseho sa Dakbayan sa Mandaue ang ordinansa nga nagdili sa paggamit og full-face helmet ug face mask nga unang giaprubahan sa administrasyon ni kanhi mayor Luigi Quisumbing sugod niadtong Nobyembre 2017.

Ang ordinansa gipatuman sa Traffic Enforcement Agency of Mandaue (TEAM), diin 81 ka mga tawo ang nadakpan.

Sa pag-asumer ni Mayor Jonas Cortes, iyang gisaad nga iya kining paamendahan.

Niadtong Hulyo 17, 2019, giamendahan sa konseho ang ordinansa nga nagtugot na sa pagsul-ob sa standard motorcycle helmet, full o half faced helmet ug face mask, basta clear lang ang visor.

Ang nangamahan sa ordinansa, Konsehal Jimmy Lumapas, chairman sa committee on transportation, communication and public utilities sa dakbayan nitataw nga “unfair” alang sa mga motorista kon kini ipatuman sa dakbayan.

Sa ubang mga dapit, wa gidili ang paggamit sa full-face helmet.

“Ang sa Consolacion man gud, pwede ang half face nga helmet. Nya sa Cebu City pwede ra sad. Bisan sa Lapu-Lapu mao sad. Nya kon gikan sila og Lapu-Lapu moagi ka sa Mandaue dakupon man nuon ka, malibog na hinuon ta ana. Mao sad naka encourage nako nga i-ammend ang ordinance,” pasabot ni Lumapas.

Giuyonan ang ordinansa sa panahon ni Quisumbing kay sagad sa mga nalambigit sa mga krimen nakataptap o naka face mask hinungdan nga walay puruhan nga makita ang nawong.

Ipatuman usab ang P500 nga penalty alang sa mga motorista ug sakay niini nga dili mag helmet.

Matod ni Lumapas nga“oppressive” ra ang penalty nga gipangayo sa Team sa miaging mga tuig kay niabot og P5,000 ang multa, apan gipaubsan og P3,000.