DUHA ka grounds ang pasiunang nakit-an sa kagamhanan sa lalawigan sa Sugbo, usa niini ang pagguba og apil sa buhatan sa Commission on Audit (COA) nga way labot sa scope of work, aron pag-blacklist sa WT Construction, Inc. (WTCI).
Si manlalaban Marino Martinquilla, legal consultant ni Gobernador Gwen Garcia, nibutyag base sa pagsukitsukit nila scope of work sa WTCI sa pagtukod sa Cebu Provincial Resource Center (CPRC), ang Bureau of Agricultural Extension (BAEx) building lang ang gub-on ug way labot ang COA building.
Apan sa nahitabo karon, giapil sa demolisyon ang buhatan sa COA nga gipatukod sa Kapitolyo sa miaging administrasyon ni Garcia.
“That is a serious violation sa contract on the part of the contractor. Nganong ilang giapil nga wa may labot sa ilang scope of work? Unya that building was constructed at a cost of more than a million (pesos), disadvantage na sa province,” pamulong ni Martinquilla dihang nahinabi sa mga tigbalita niadtong Huwebes, Hulyo 25, 2019.
Siya nidugang nga nakalapas usab sa mga lagda sa COA ang demolisyon kay kinahanglan nga dunay pagtugot sa maong buhatan ang pagguba sa maong edipisyo nga gipanag-iya sa gobiyerno.
Gawas nga giguba sa WTCI ang edipisyo sa COA, nawagtangan usab og potential nga income ang Kapitolyo tungod kay ang pwesto nga kanhi giabangan sa Department of Agrarian Reform (DAR) sa ikaduhang andana sa Legislative Building, maoy giukopahan karon sa COA.
Ang 1,620 metro kwadrado nga espasyo giabangan sa DAR sa tag P220,000 matag buwan o sobra sa P2 milyones matag tuig nga karon nibalhin na sa ubos sa Legislative Building.
“So, dako gyud kaayo og damage nga nahimo sa Kapitolyo sa maong konstruksyon. Alkansi ang Kapitolyo kay ang lugar nga giabangan sa DAR gibakantehan man, nawagtangan og income,” sumala ni Martinquilla.
Laing kalapasan nga ilang nakaplagan sa bidding document nga gisumitir sa WTCI, ang pangangkon niini nga ang pagtukod sa Cebu International Convention Center (CICC) maoy largest single contract nga nahimo niini.
Si Martinquilla nipasabot nga dili lang usa ka kontrata ang nalambigit sa katukoran sa CICC kondili sobra sa tulo.
Moabot sa kapin P830 milyones ang kinatibuk-ang gasto sa pagtukod sa CICC, nga gigamit nga venue sa ASEAN Summit niadtong 2007. Sa records sa Office of the Ombudsman, apil niini ang dugang pagtrabaho ug pagpalambo sa edipisyo sama sa P16.8 milyones nga architectural and engineering design contract, P307 milyones combined structural steel contracts, P59 milyones adjacent/contiguous works, P7.5 milyones cladding contract ug uban pa.
Ubos sa Republic Act 9184, aron mo-qualify ang usa ka bidder kinahanglan nga nakahimo kini og proyekto nga usa lang ka kontrata nga katunga sa kantidad sa P1.3 bilyones nga maoy kantidad sa CPRC.
Matod ni Martinquilla, falsification of bidding document ang gibuhat sa WTCI nga usa ka ground sa pag-blacklist sa contractor.
Karong Biyernes sa buntag, Hulyo 26, 2019, dunggon sa Regional Trial Court Branch 29 sa dakbayan sa Toledo ang motion to withdraw nga giduso sa Kapitolyo nga magbakwi sa petition for injunction bahin sa pagpugong sa katukoran sa CPRC.
Si Martinquilla nagkanayon nga sa dili madugay iduso na nila ang mga dokumento ngadto sa Bids and Awards Committee (BAC) sa Kapitolyo nga mosumitir ngadto sa Government Procurement Policy Board (GPPB) aron ma-blacklist ang WTCI sa pagsalmot sa mga proyekto nga himuon sa gobiyerno.
Hatagan hinuon og due process ang WTCI sa dili pa kini i-blacklist diin moagi kini og hearing. (SCG)