LAIN na usab nga lalake ang napalgan nga biktima sa susamag vigilante-style killing sa Dakbayan sa Talisay.
Apan bisan pa ning sunodsunod nga mga patay nga dunay pattern nga susama og binuhatan sa vigilante, gipaneguro sa Siyudad ug kapulisan nga way vigilante group nga naglihok sa Dakbayan sa Talisay.
Ilang gibasol ang mga drug syndicate ning mga pagpamatay nga gipatuo nga iya sa vigilante.
Biyernes pasado alas 5 sa buntag, Hulyo 26, nakaplagan si Jerh Sigue, 27, welder nga gigapos sa usa ka poste sa sityo Bogo, Campo 4.
Gitaptapan ang iyang mga mata ug dunay mga 10 ka samad pinusilan.
Gibutangan kini og paskin nga dunay nakasuwat: Undang na lage mo. Ug dili gani, kamo na isunod tulisan, drug pusher, killer ug drug lords.”
Si Charles, manghod, maoy niila kang Jerh.
Matod niya, mga usa ka semana nang nawagtang ang iyang maguwang.
Iyang gikompirmar nga usa kini ka drug user, apan wa siya masayod kon tigbaligya ba.
Giangkon sa manghod nga napriso na kaniadto ang iyang maguwang.
Matod sa usa ka gwardiya sa dapit, pasado alas 2, Biyernes sa kaadlawon, nakadungog siya og mga buto sa armas, apan wa na siya nisusi pa.
Si Sigue ang ikatulo nang biktima sa summary execution sa Dakbayan sa Talisay sa nakalabay nga mga adlaw.
Niadtong Lunes sa buntag, Hulyo 22, napalgang nagbitay nga patay na si Renante Otero, 44, sa taytayan sa Cebu South Coastal Road, sityo Isla Verde, Barangay San Isidro.
Si Otero gitumbok nga nalambigit sa illegal drugs ug ubang mga krimen sa dapit.
Niadtong Huwebes sa buntag, Hulyo 25, nakaplagang patay ug ginapos ang mga kamot ni Jimbo Gadiano, 33, minyo, sa usa ka bakanteng lugar sa sityo Ilang-Ilang, Barangay Lagtang.
Gitumbok si Gadiano sa kapulisan nga durugista ug bata-bata sa usa ka drug lord.
Kini nga mga panghitabo nakapahinumdom sa mga Talisaynon niadtong dekada 80 nga grabe ang patay sa Dakbayan nga gibasol kaniadto sa mga vigilante nga naglihok sa siyudad.
Way vigilante
Way vigilante sa Siyudad sa Talisay.
Kini ang gipaneguro ni Mayor Gerald Anthony ‘Samsam’ Gullas ug hepe sa Talisay City Police Station, Police Major Orlando Carag, Jr.
Matod ni Gullas nga nagpaabot siya sa resulta sa imbestigasyon sa kapulisan, apan masaligon siya nga luwas ang siyudad.
“Peaceful ang Talisay City sa walang ginagawang masama. Sa mga may masasamang ginagawa or gagawin, lalo na pag-nakipag encounter sila sa mga tao namin (police), we are ready to face them,” matod ni Carag.
Matod ni Carag nga usa sa ilang gisubay karon nga mga nag-unay nga grupo sa mga nalambigit sa ilegal nga drugas ang nahitabo sa mga insidente sa patay sugod niadtong Hulyo 12 sa gabii.
Ilang gitan-aw nga buot lang patuohon sa grupo ang publiko nga vigilante group ang naghimo.
Gaunay?
Kon si Police Regional Director Debold Sinas ang pasultihon, ang kanhi grupo ni anhing Steve Go, giila nilang drug lords sa Dakbayan, maoy nag-unay.
Human mapatay si Go, nipuli ang pangabaga niini nga si Girly Luage, apan napatay usab sa Provincial Intelligence Branch (PIB) sa Cebu Police Provincial Office (CPPO).
Si Sigue gitumbok ni Sinas nga maoy nakig-ipon sa kapuyo ni Go.Iya gitumbok si Gadiano nga bata-bata kaniadto ni Luage.
“Walay vigilante sa Talisay City. We are inclined, all the motive, nga sila-sila ra nag away," matod ni Sinas.