DIREKTOR sa kapulisan sa Central Visayas surpresa nga mibisita sa Waterfront Police Station ug gipaubos ang tanan sa kinalit nga drug test isip kabahin sa internal cleansing nga programa sa Philippine National Police (PNP).
Nakadawat og impormasyon si Police Regional Office Central Visayas Director Brigadier General Debold Sinas nga aduna'y mga pulis nga wala moundang sa paggamit sa ilegal nga drugas.
Moabot ngadto sa kapin 60 ka mga personnel ang Waterfront Police Station. Gimandoan ang tanang sakop niini nga ipa-report ug ipaubos sa drug test, koon kinsa kadtong mitago ug magdumili sa pagpa-drug test ilabay gawas sa Cebu City Police Office (CCPO).
“Katong naka-post among gipangtawag except kadtong nag-respond for emergency. Everybody should pass the drug test. Katong dili maka-pass sa drug test, they will be relieve from CCPO assigned diri sa among RPHAU (Regional Personnel Holding and Accounting Unit) para ma-drug test sila then assign them outside CCPO,” matud ni Sinas.
Magpadala usab si Sinas og K9 unit sa Waterfront Police Station aron susihon ang mga locker sa mga pulis kon wala ba kini tinagoan nga pinutos sa ilegal nga drugas.
Gituyo niya ang Waterfront Police Station tungod nahimutang sila sa pantalanan sa Dakbayan sa Sugbo ug kinahanglan nga limpyo silang tanan sa paggamit sa ilegal nga drugas.
Samtang usa ka pulis nga gitakdang moretiro na sa sunod tuig ang nagpositibo nga migamit sa ilegal nga drugas, kini atol sa gihimong drug test sa Police Regional Office Central Visayas sa lungsod sa Villahermoso, Negros Oriental.
Ang maong pulis giila ni Sinas nga si Police Master Sergeant Jimmy Agcopra nga giparelibohan na sa katungdanan ug gibawian na sa iyang service firearms.
Gipasabot sa heneral nga mag-atubang og kasong administratiba ang maong pulis ug dili na kini makaretiro sanglit hugot sa baruganan ang PNP nga taktakon ang ilang sakop kon masuta nga migamit kini og ilegal nga drugas.
“Dili na siya ka-retire kasi ang gusto gyud ni president ug chief PNP, pag nag-positive ka sa drugs, you’ll be dismissed. Ang minimum nga penalty ani kay dismissal from the service,” matud ni Sinas.
Ang pulis gipaubos na sa imbestigasyon aron masayran kon kinsa ang tig-supply kaniya sa ilegal nga drugas alang sa himuon nga follow-up operation. (Superbalita Cebu)