KARONG bag-o nakamatikod ko nga nidaghan na ang mga nagmotorsiklo nga nagsul-ob og helmet. Kini nga talan-awon maoy epekto sa subsub nga kampanya sa otoridad pagpanakop niadtong nakalapas sa balaod labot sa pagsul-ob og helmet.
Bisan ang mga tanod niapil na sa kampanya pinaagi sa pagluwat og mga pasidaan nga tumanon lage ang ang maong balaod. Di man tuod sila makapanakop apan gidasig sila sa pagpara sa mga driver nga wala maghelmet unya pasidan-an.
Ang DILG wala na kinahanglana nga moluwat og kamanduan labot niini sanglit si Barangay Kapitan daan na nga nasayod nga apil ni sa iyang responsibilidad pagpatuman sa mga balaod. Dugay na ni nga balaod pero gibaliwala lang sa uban. Samot na kon nilapas sa balaod mao ra sab ang tigpatuman sa balaod.
Kita siguro mo sa mga nag viral nga picture o video sa internet nga nagpakita sa mga traffic enforcer nga wa magsul-ob og helmet samtang nagdrive og motorsiklo. Gawas sa pagsul-ob og helmet gihingusgan sab ang pagpatuman sa ubang balaod.
Sama sa gihimo karon sa ciudad sa Talisay. Hugot nga pagpatuman sa no parking ordinance batok sa mga sakyanan giparada sa daplin sa kadalanan. Dugay na sab ning maong problema nga usa sa gipasanginlan nga nakatampo og dako sa kahuot sa dagan sa trapiko.
Duna koy pipila ka obserbasyon sa usa ka karsada sa may Tabunok area human ko makabisita pipila ka adlaw na ang nakalabay. Nagpasad ang mga traffic enforcer nga nagdereher sa dagan sa trapiko. sa may dalan Rabaya di layo sa flyover.
Sanglit hapon kadto, bagang duot sa mga tawo ang akong nasaksihan nga naglakaw. Kasagaran sa pedestrian sa karsada na maglakaw tungod sa kaapiki sa sidewalk nga para unta nila.
Susamang problema masinati sa karsada kilid sa flyover. Atong sugyot sa bag-ong namunoan apil na sa ubang lokal nga pangagamhanan, apilon sab nila og tutok ang mga sidewalk ilabi na sa dapit nga gagmay kaayo ang mga karsada.
Kon sa karsada na magsubay ang mga tawo mosamot ka apiki ang bul-og sa trapiko. Sa downtown Cebu City daghang sidewalk nga mahulagway nato nga dili PWD friendly.
Kini tungod kay daghang mga establismento nga nagtukod og mga concrete barrier sa mga sidewalk. Ang rason mao ang baha nga kanunay nga masinati panahon nga mobunok ang ulan. Naay sidewalk nga gipatas-an nya kinahanglan pa ka motikang og taas tungod sa sementadong barrier nga giali.
Kon nagtuklod ka og wheelchair nga gisakyan og PWD o masakiton, asa man nimo paagion nga gawas nga naay barrier, di sab level ang agianan. Bisan kadtong nag gamit og crutches lisod ang pagtikang tungod sa daghang barrier.