MIBUSWAK ang posibilidad nga mapadayon ang pagpalambo sa walo ka ektaryang luna sa Kawit Island o Isla dela Victoria sa SRP. Gilatid ang kasabotan tali ni Mayor Tomas Osmeña ug Gokongwei-led Universal Hotel and Resorts, Inc. (UHRI) sa gastohon nga 18B pesos. UHRI mao ra sab ang JC Summit Holdings nga mother company sa Universal Robina, Robinson Malls, Robinsons Land ug Cebu Pacific nga gipanag-iya ni John Gokongwei Sr. Tukoron ang upat ka hotel towers nga dunay 1,000 ka lawak, convention center, casino, restaurant, uban pa. Dimolison ang Sugbo ug Senior Citizens building ibalhin sa maong developer tupad sa Senior Citizens Park duol sa city hall. Modako ang kinitaan sa Siyudad, momahal ang yuta sa SRP ug daghang mga Sugboanon ang makatrabaho. Ang kinitaan i-abli og library sa mga publikong merkado sa Ramos, T. Padilla, Unit 2 sa Carbon ug Taboan nga mogasto og 100M pesos.
Gisalikway sa mga sakop sa Barug sa Mayo 22, 2018 kay alkansi ang Siyudad nga 90 porsento sa developer ug 10 porsento lamang sa Siyudad basi sa profit sharing scheme. Wala mohatag og pagtugot ni Osmeña sa pagpirma og kontrata. Giduso og balik ni Konsehal Jun Gabuya sa Agusto 7, 2018 human nga nahadugang sa BOPK ang SK ug ABC Federations. Si Vice Mayor Edgar Labella mibarog nga dili balido ang maong resolusyon human wala aprobahi sa unang pagdiskotir sa konseho.
Si kanhi Kapitan Amilo Lopez sa Busay misang-at og kasong sibil batok ni Osmeña ngadto sa korte aron moisyo og temporary restraining order o kaha writ of preliminary injunction pagpugong sa paglagda sa kontrata. Barug misang-at usab og kaso nga naghangyo nga mointerbinir ang korte pagbaliwala sa resolusyon nga gipasar sa BOPK. Apan bisan pa sa duha ka kasong sibil gipahigayon gyod ang groundbreaking ingon og dunay giapas ilabina kay niadtong higayona nagpadulong sa mga adlaw sa eleksyon. Apan niining pagdaog ni Labella siksikon og balik ang kasabotan sa maong joint venture. Anhi unya mahibaw-i ang kapalaran sa Kawit Island nga kabahin sa 295 ektarya sa SRP nga giugmad sa 1995-2005 panahon ni Osmeña. Migasto og 26.33B pesos nga inutang sa JICA maimpas sa 2025. Unang investor ang Bigfoot, nakabaligya og 10 ektarya sa Filinvest, 40 ektarya joint venture tali sa Filinvest ug 30 ektarya sa SM Seaside City. Si Mayor Mike Rama naakabaligya og 45.2 ektarya ngadto sa SM, Ayala ug Filinvest nga 16.7B pesos. Gusto ni Osmeña nga idiskasi kay barato ra ang pagbaligya sa tag 30,000 pesos matag metro kwadrado. Apan nasupalpal si Osmeña kay ang gipalit sa SM nga gitukoran sa Seaside City tag P8,000 ra ang metro kwadrado. (csa_1156@yahoo.com/09064648954)