KON ikaw malipayon ug kontento na sa imong ka relasyon, makapangutana dayon ka sa imong kaugalingon kon asa kini paingon o siya na ba ang ‘The One’ nga gituohan nga imong ma forever.
Apan matod ni Celia Schweyer, usa ka eksperto kon maghisgot og dating ug pakig-relasyon sa DatingScout.com, wa magpasabot nga bisag dugay, nindot o halos perpekto na imong relasyon moresulta kini sa kaminyuon kay di ang mga maanindot nga kasinatian sa manag-uyab ang basihan para molahutay ang relasyon kundi mga kasinatian sa kalisod ug kasakit nga maagi-an.
Puno ni Schweyer kining mosunod maoy signos nga ang imong relasyon di mopa-ingon sa kaminyuon.
Magkakuyog ra mong duha sa mga kalipay apan magbuwag sa kasakit. Di kalikayan sa kada relasyon nga duna gyuy panagbangi sa huna-huna, pulong ug buhat nga magkinahanglan og kinasingkasing nga pagsabot para masulbad ang isyu. Kon ang manag-uyab mag-iyahay og likay kay mahadlok maglalis o mag-away labi na kon hisgutan ang pamilya o subra dosena nga kaparintihan, pagbahig og gasto sa kinitaan, ug kina-iya nga di makaon, kini nagpasabot nga di molahutay sa kaminyuon.
Sunod kining sobra ka drama nga relasyon. Kon ang imong uyab way maayong relasyon kay magsegi lang og ka selos o pangaway sa imong pamilya, kaparentihan o higala, nagpakita kini nga kuwang sa suporta ug pagdawat sa imong pagkatawo.
Laing signos kining kina-iya nga iya-iya. Wa kay labot o apil sa iyang mga plano ug damgo. Iya pirming gamiton ang pulong nga iya imbis inyong duha. Pasabot nga wa ka ma-apil sa iyang mga pangandoy ug hulagway sa kaugmaon. Apan kon kanunay mo ingon ‘akong plano para natong duha’, kini may puruhan nga apil ka sa iyang panglantaw.
Katapusan kining panagbangi sa halos tanan. Kining kaminyuon di lang puro relasyon kundi partnership sab. Importante nga duna moy teamwork unya kumon o parehas inyong panan-aw o direksyon kay kung magsegi og lantugi, nganong magminyo pa man, di ba?