AMINADO si Gingoog City Mayor Erick Cañosa nga dakong hagit ang manilbihan isip mayor sa dakbayan sa Gingoog, Misamis Oriental.
Gibutyag niini nga sulod sa 24 ka adlaw nga liderato sa siyudad ubay-ubay na usab ang iyang gipang sugdan.
“Well, it’s very challenging since ang Gingoog was governed from a previous administration almost 15 years. Daghan napasagdan ug okay lang no, kay we are here to help Gingoog. We are here to develop Gingoog. Kon unsa man gani kakulangon sa previous administration, naa ta dinhi para sa pagtabang para iimprove atong siyudad,” matud ni Cañosa.
Dugang niini nga bag-o lang siya nakatambong og mandatory seminar nga gi-host sa Department of Interior and Local Government (DILG), ug daghan siya og natun-an niini nga kinahanglan iyang i-apply sa siyudad.
“Daghan kaayo mga kinahanglan buhaton sa atong siyudad, like peace and order. Where in fact, kinahanglan i-improve ug tagaan og pokos atong peace and order, and public safety plan in Gingoog,” matud niini.
Gikalipay sab niini nga kinahanglan sa first 100 days adunay checklist nga matuman, apan garbo niining giingon nga 75 niini nahimo na 10 ka adlaw pa lamang.
“We are very happy nga supposed to be there are programs. There are items in the checklist sa 100 days nga supposed to be atong ma implement within 100 days. But we are very happy nga within 10 days nahuman na ang uban,” dugang niini ug miingon nga daghan na ang natuman nga anaa sa checklist.
Dugang niini nga sa 23 ka mga adlaw uban kang Bise Mayor Peter Unabia, dul-an 75 porsinto na ang natuman sa listahan sa DILG.
Gikatakda usab nga mohatag og report si Cañosa sa dakbayan sa iyang kaugalingon nga State of the City Address.