MAGTIGI ang Southern Philippines Polytechnic College, Inc. (SPPCI) ug St. Patrick Math-Sci School (SPMSS) aron nga maangkon ang numero unong puwesto sa junior division bracket C alas 3:30 sa hapon adlaw’ng Sabado, Hulyo 27, sa pagbalik sa Davao Youth Basketball League (DYBL) 2019 ug Liga Pinay 2019 sa Margarita Gym, J. P. Laurel Avenue, Davao City.
Ang SPPCI ug SPMSS dunay managsama nga usa-daut, walay-pildi nga kartada. Ang nauna naglukmay sa Rizal Memorial Colleges (RMC) Bulldogs, 62-58, niadtong Hulyo 6 samtang ang naulahi nakaipsot sa arangkada sa Immanuel School of Davao (ISD), 55-53, niadtong Hulyo 7 sa torneyo nga gipasiugdahan sa Red Sports Events.
Ang ilang tigi mao ang nag-inusara sa junior match sa maong adlaw kon diin upat ka mga duwa magtapad sa cadet teams Ford Academy of the Arts (FAA) batok sa Assumption College of Davao (ACD) sa alas 10:30 sa buntag, Jesus Soriano National High School (JSNHS) batok BSHS sa alas 11:45 sa buntag, Davao City National High School (DCNHS) batok sa RMC sa ala 1 sa hapon ug ISD batok sa San Pedro College (SPC) Ulas sa alas 2:15 sa hapon.
Ang FAA ug ACD managsama sab nga naghupot sa 1-1 rekord sa bracket A samtang ang JSNHS dunay 1-1 ug BSHS dunay O-2 sa bracket B.
Samtang ang DCNHS ug RMC magduwa sa bracket C uban sa 1-1 nga kartada matag usa, 0-2 sab ang ISD samtang ang SPC Ulas wa pay natala nga daug.