COTABATO CITY -- Tibuok gabii nga nilusad og air-to-ground assault ang militar batok sa mga terorista nga Bangsamoro Islamic Freedom Fighters (BIFF) sa utlanan sa mga probinsiya sa Maguindanao ug North Cotabato.
Ang pagpaulan og mga bomba nagsugod alas 9 sa gabii niadtong Huwebes ug natapos alas 7 sa buntag Biyernes, Hulyo 26.
Tumong sa surgical strike sa Joint Task Force Central nga mapughag na ang grupo sa BIFF nga gipangulohan ni Shiek Esmail Abdulmalik alyas Kumander Abu Toraife ug uban pang miyembro sa Dawlah Islamiyah sa SPMS Box, apil na ang naa sa Liguasan Delta.
Unang gipaulanan og bomba sa duha ka fighter jet, uban sa lain pang duha ka attack helicopters sa Philippine Air Force (PAF) ang gilubluban sa BIFF sa Barangay Dasawao, Shariff Saydona Mustapha.
Gawas sa air-strike, gikanayon sab sa ground force sa mga sundalo ang laing grupo sa tulo ka paksiyon sa BIFF nga nakig-alayon sa mga langyaw nga terorista nga sakop sa Islamic State of Iraq and Syria (Isis).
Gikompirma ni 602nd Brigade commander Brigadier General Afredo Rosario nga ang lakang usa ka Division wide operation sa 6th ID ug proactive measure sa militar aron dili nga makasabwag og kaguliyang ang mga nahisgutan sa katawhan.
Sumala pa nga duha ka gabii nga gitugaw ang pagkatulog sa mga molupyo sa maong mga lugar sa kagahob sa paglupad sa abyon sa militar ug ang dagkong mga buto sa kanyon ug bomba.
Padayon pang giihap ang mga nahimong casualty sa maong pagpamomba sa militar batok sa BIFF. (Edgar E. Fuerzas)