USA ka tinun-an sa elementarya ang alegasyong gilugos sa habal-habal drayber sa Talomo District, Davao City kon diin mao karon ang gipanubayan sa mga awtoridad.
Mismong si Police Major Ronald Lao, hepe sa Talomo Police Station, nagkompirma sa hitabo nga dunay mireklamo sa ilang buhatan nga alegasyong gipanamastamasan sa drayber.
Apan wala gibutyag ni Lao nga positibo ba nga nahilabtan ang elementary pupil.
“So far, padayon ang atong gihimong pagpanubay sa hitabo. Wala pa’y insakto nga detalye kung tinuod ba gyud kini, basta naa tay nadawat nga reklamo, gisubay pa sa operatiba,” ingon ni Lao kinsa mipaklaro sa Superbalita pinaagi sa telepono Biyernes, Hulyo 26.
Nasayran nga nabaniog na ang istorya nga dunay giingong sama niini nga nahitabo sa maong tunghaan sa Talomo District, diin di lang makausa apan makadaghan na busa mga ginikanan nangahadlok ug gilayong gipangsundo ang ilang mga anak, ilabi na gyud sa mga babaye.
Usa ka nagpakabana nga ginikanan sa maong tunghaan nag-asoy sa Superbalita nga gawasnon pa ang suspek hangtud ning higayona kinsa giingong misibat dihang iyang nasayran nga nakabalo na ang kadaghanan sa iyang gibuhat sa maong dapit.
Sa kasamtangan, padayon ang gihimong pagpanubay sa kapulisan ug ang paghan-ay sa Women and Children’s Protection Desk sa Talomo PNP sa mga impormasyon nga gibutyag sa biktima ngadto kanila.