HUMAN manghilam-os sa pagsaway sa publiko tungod sa kadaghan sa mga kaso nga nabasura sa Sandiganbayan, ang buhatan sa Visayas Ombudsman karon mipasalig sa katawhan nga ila gyung tapuson ang imbestigasyon sa Balili Property Controversy sa dili pa moabot ang Mayo 10 nga piniliay.
Kini aron sa paglikay nga mahug na usab sa walay nada ang administrative nga aspeto ning maong kaso tungod sa Aguinaldo Doctrine nga maghimong magpapas sa tulubagon sa Public Official nga nag-atubang og asunto apan gipili gihapon sa katawhan sa miabot nga piniliay.
Kay sa interpretasyon sa Korte Suprema, kini susama da sa pagpahamtang og hukom sa katawhan kay bisan og sila sayod sa iyang kaso, ila man gyud gihapon siyang gipili.
Apan ang nakaporke lang ning maong pasalig sa Ombudsman kay ang mga Sugbuanon sayod man nga hangtod karon ang lagda sa ilang buhatan nga gipakanaog sa TanodBayan nga si Merciditas Gutierrez nagpabilin mang maoy matuman. Unya naa na man sab sa pahak sa publiko nga wa gyuy mahitabong resulta basta mga alipores ni Presidente Gloria Arroyo ang mag-atubang og kaso.
Kining maong “public perception” nasemento pa gyud sa nahitabong pagbabag mismo ni Deputy Ombudsman Pelagio Apostol sa rekomendasyon sa fact-finding team nga nagda sa Cebu International Convention Center nga kaso.
Nga siya bisan og way hanaw, mideretso sa pagmando sa iyang mga sakop sa pagpangitag ebidensiya nga mag-abswelto sa mga akusado.
Unya kay napagya man, gihatagan na lang og kunsuylo ang katawhan nga adto na lang kuno isang-at sa ilang ulohang buhatan ang desisyon.
Wa man gani nila mahuman ang CICC, karon mao na say ilang ipanghambog nga humanon ug tapuson ang Balili. Kinsa may gustong hagwaon sa kabuang sa Ombudsman? Dili lang ang kining maong mga dagkong kaso ang gilubong sa kalimot ning maong buhatan.
Pwerteng daghanang mga reklamo ang wa gyud gani moirog bisan sa pagpanglabay sa katuigan kay mao ra man say ilang atimanon ang mga kasong sigehan og sunggal sa media kay lagi gusto sang magpasikat.
Dili lang siyam ka buwan kundili katuigan na ang nanglabay sa pagkamabdos sa katawhan sa pasalig sa Ombudsman ning mga kasong walay kahumanan. Unya karon mohangyo nga sila sabton ug saligan na usab sa katawhan.
Angayan tingaling ilang isilsil sa alimpatakan nga ang respeto ug pagsalig tuyo nga ihatag sa mga tawo kon kini ila mismong nakita pinaagi sa tinarong nga pagtrabaho ug dili kay kutob lamang sa estoryang butbot ug sa makapamabdos nga pasalig.