Nalzaro: Pangilad ug gimik
PUWERTING ilara ni Talisay Mayor Soc Fernandez ug ang kapulisan sa maong dakbayan ni Joavan Fernandez, ang adopted son sa mayor.
Misakay intawon sila sa sakayang buslot.
Gironda sa kapulisan ang usa ka motel sa Talisay human mireklamo si Joavan nga nagpahigayon kini og malaw-ay nga kalihukan. Matod pang Soc nga mitabang na kuno ang iyang anak sa pagsumpo sa immoral nga mga kalihukan sa iyang dakbayan.
Tuod man gironda sa kapulisan ang Queensland Motel apan nasuta nga wala diay kini magpahigayon og malaw-ay nga kalihukan.
Nasuta nga gidumtan lang diay ni Joavan ang maong motel gumikan kay wala siya hatagi sa iyang kagustuhan sama sa ilimnon ug pagkaon sa dihang mi-check in kini sa maong hotel. Matod pa sa tinugyanan sa maong hotel makaduha o makatulo sa usa ka semana mo-check in si Joavan dala ang nagkalain-laing babaye sa maong motel. Unya modemanda nga librihon. Nasiyot intawon sa taru si Soc ug ang kapulisan. Pagkatoytoy!
GIMIK?
Wala ako makaila personal aning Luna Sabalones. Mitumaw lang ning iyang pangalan sa dihang mi-file siya sa iyang certificate of candidacy pagkakongresista sa unang distrito sa lalawigan sa Sugbo. Iyang gi-atbangan si Kong. Eduardo kinsa anaa na sa iyang ikatulo nga termino. Modaog kaha siya batok ni Eddigul? Aw, lingin man ang bola.
Pero dili na maoy isyu. Ang isyu mao ning iyang reklamo ngadto sa NBI 7 nga gi-ilad kuno siya sa usa ka grupo kinsa misaad nga doblihon iyang kuwarta. Nakahatag na kuno siya og 3 milyones ka pesos. Pastilan kini si Ms. Sabalones morag karon pa natawo.
Kinsa gud tawon modoble anang imong kuwarta. Aw, sala nimo na nganong tug-tug ka sa pansitan. Pero kadyot lang dili lang kaha ni gimik aron ma-ilhan nga kandidato siya? Pag-adto niya sa NBI office, nangimbitar gud taga media. Siyot gihapon sa taru ang taga media aning estoryaha da.
POPULARITY
Abi ninyo daghang mga gimik nga himoon kining mga kandidato karon aron lang mapublikar ang ilang pangalan ug esturyahan sila sa media. Kanang mga incumbent nga mowaldas sa kuwarta sa kagamhanan. Usa na sa paagi aron makadani og boto. Tan-awa ra unya di ba adunay mga assassination attempts. Apan dili ma-igo og dili mamatay. Pero maayo unta og madayonan sila no?
Kini gong eleksiyon, gawas sa kuwarta popularity man gud ni. Mao bitaw nga modaog kanang mga artista kay popular sila. Popularity plus kuwarta, aw, kana maayo nang kombinasyon sa pulitika.
(bgnalzaro@gmanetwork.com)