SA UNANG pagkakita ni Peter Rago sa iyang asawa nga si Amorganda “Amor” Raganas-Rago, nadani na dayon siya sa kaanyag niini.
Nahitabo kini niadtong 1995 sa usa ka praktis sa passion play sa Sto. Tomas de Villanueva Parish (STVP) sa Barangay Poblacion Pardo, siyudad sa Sugbo.
Si Peter maoy nidala sa papel nga pangulong pari nga si Anas, samtang si Amor, ang usa sa mga babaye sa Herusalem sa drama nga Sugat sa pagkabanhaw sa Ginuo.
Ang duha pulos aktibo nga mga miyembro sa Youth Ministry sa Catholic Charismatic Renewal Movement (CCRM) sa parokya.
Niadtong 1996, namugna ang gihulagway ni Peter nga “misteryo sa himaya” dihang nag-abot sila isip mga magtutudlo sa Holy Rosary School of Pardo (HRSP).
Dili kini ang unang higayon nga nag-abot ang duha sa HRSP kay samtang nag-eskwela si Amor sa fourth year high school, nagtudlo na si Peter sa first year high school sa eskwelahan sa iyang unang tuig.
Moabot sa 12 ka tuig ang gintang sa ilang edad.
Si Amor nisugilon nga kon magsugat sila ni Peter, mamuwa ang nawong sa lalake.
“Daghan kaayo mo-backer niya diri nako. Naka-feel ko nga sincere siya diri nako,” matod ni Amorganda nga gikilig samtang niasoy.
Niadtong Agusto 1996, nanguyab si Peter kang Amor ug gisugot niadtong Septiyembre 23 sa samang tuig.
Nagustohan ni Amor ang pagka God-fearing, responsabli, maayong tawo, maayo manabi ug tinahod sa mga tawo si Peter. Nakadayeg usab siya sa pagkamaayo niini motugtog og gitara, organ ug ubang musical instruments.
Gawas nga maanyag si Amor, na-inlove si Peter sa pagkaparaygon niini, buotan ug puno sa determinasyon nga molampos sa kinabuhi.
Nakasal sila niadtong Hunyo 27, 1998 ni Msgr. Jose Montecillo sa STVP diin nikonselebrar ang upat ka mga pari nga sila si Rev. Fathers Diomedes Juezan, Titing Padilla, Gene Herrera ug Msgr. Eliseo Gamallo.
Makahuloganon ang kasaulogan sa ilang renewal of vows sa ika-15th wedding anniversary niadtong 2013, kay nipakasal sila og walo ka paresan nga dugay na nagpuyo. Kini ilang mga paryente, higala ug silingan.
Tinguha unta nila ang 15 ka paresan, apan ang uban nasango sa pag-andam sa gikinahanglan nga mga dokumento.
Sila ang niabang sa gowns ug barong nga gisul-ob sa walo ka paresan. Sila usab ang nigasto sa reception ug paglukat sa gikinahanglan nga mga dokumento.
“Nindot kaayo ang feeling... The following week nakakita nako nila mosimba sila, the whole family. Pila ka tuig di sila mosimba kay wa sila nakasal. After ato, makakita ka nila mosimba na sila, mangalawat na sila,” dugang ni Amor, principal sa Pamutan Integrated School, siyudad sa Sugbo.
Sa renewal of vows, sila si Peter ug Amor naa sa tunga samtang naa sa isig ka kilid ang tag upat ka paresan.
Human sa okasyon, nahimo na nila nga tradisyon uban sa walo ka paresan ug ilang mga anak nga magtapok sa matag Hunyo 29 sa tuig aron saulogan ang anibersaryo sa ilang kasal nga dungan sa adlaw nga natawhan ni Peter.
Sila si Peter ug Amor nitambag sa magtiayon labi na kadtong nag-atubang og krisis nga moduol sa Ginuo ug himuon kini nga sentro sa kaminyuon. Ipadaplin ang garbo ug ipatigbabaw ang pagpasaylo, unconditional love ug pagsakripisyo labi na kon naay mga bata.
“When things go wrong, go back to your marriage vows. The best ang marriage vows nga dili nato kalimtan, kon unsa ang atong gi-promise: for richer or for poorer, in sickness and in health, till death do us part... Inubanan baya na sa blessing sa Ginuo,” dugang ni Amor.
Niadtong Hunyo 27, 2019, gisaulog nila ni Peter ug Amor ang ilang ika-21 nga wedding anniversary. (SCG)