LAUMAN ang kulba-hinam nga tricks nga masaksihan sa mga Dabawenyos sa DC x Grind 1st Kadayawan Skate Competition, Agosto 17 sa Davao City Skate Park.
Si skate technical director Mae Sanchez, atol sa Davao Sportswriters Association (DSA) Forum sa The Annex sa SM City Davao nagsulti, “Hoping that this would just be a start as we support the Davao Skate Council (DSC) to promote the thrust of the city sports office to hone the children into skateboarding.”
Ang aktibidad nga mag-feature sa intermediate ug advanced categories, gihimo sab kapartner ang Davao Digital Influencers.
Ang elimination round himuon sa Agosto 3 alang sa intermediate category diin ang qualifiers mo-abanse sa main tournament, ug ang modaug modawat og cash prizes ug gift certificates.
Mga inilang Mindanaoan skaters mohatag sa lisud apan makalingaw nga hagit.
Ang Manila skater June Castor, Cagayan de Oro City’s Dalton Bautista ug Davao’s Joey Betita maoy hurado.
Dugang ni Sanchez nga ang skate park nahimo na sab nga tourist spot sa siyudad ilabi na nga daghan na ang naga-adto didto aron magpahulagway luyo sa mga indibidwal nga misuway og kat-on sa maong matang sa isport.