“Imparting the knowledge and skills to the people in Gumitan is really heartwarming.”
ANG passion sa usa ka indibidwal sa pagtabang, pabiling nagtuhop sa iyang dughan luyo man sa mga hagit ug kalisud.
Napamatud-an kini sa grupo sa mga skills trainer ug assessor sa Technical Education and Skills Development Authority (Tesda) sa rehiyon.
Ning bulan sa Hulyo, mihimo og training ang grupo sa pagpanguna ni Arlyn Basquez kauban sila haircutting trainer Joseph Palen, manicure and pedicure trainer Rose Arcillas, hilot wellness massage trainer Marcela Rondina.
Nag-una nilang beneficiary ang 75 ka molupyo sa Barangay Gumitan Marilog District, dakbayan sa Davao.
Kauban sab nila sa grupo sila Tesda Training Focal Jol Atablanco ug Juna Arraez, ka-partner ang 16th Infantry Batallion sa Philippine Army.
“Perting layua maam lisod kaayo ang dalan, halos 5 ka oras ang biyahe,” ni Basquez sa pakighinabi via Facebook chat sa Superbalita Davao.
Ni Basquez nga maoy trainer sa haircutting, luyo sa kalisod nga ilang nasinati, apan, satisfaction ug kalipay ang ilang nabati nga naabot nila ang lugar, maka-ambit sila og pagtulun-an sa mga nanimuyo ngadto.
“Lipay kaayo mi mam nga naabot mi didto.”
Luyo sa taas kaayong biyahe, apilan pa sa dalang daw tsokolate, gikinahanglan pa nilang motabok sa sapa aron lang maabot ang lugar.
“Kahit gaano kahirap hahamakin basta maabot ka lamang. Imparting the knowledge and skills to the people in Gumitan is really heartwarming. Thank you TESDA for this wonderful experience,” ni Basquez sa iyang Facebook post.
Human sa gihatag nilang training sud sa duha ka adlaw, ang 75 nila ka beneficiary nga mga lumad ang migradwar.
Malaumon ang grupo nga ang bag-ong kaalam nga napaambit nila ngadto sa mga lumad makatabang nga sila makabaton og dugang skills nga magamit nila sa panginabuhian.