GISUGDAN na og panakop sa Cebu City Transportation Office (CCTO) ang mga electric trikes (e-trikes) sa kadalanan sa Dakbayan sa Sugbo nga gipanggamit nga pasaheroan. Nag-anam na man gud ni kadaghan ang mga e-trike nga nanagan dinhi sa Dakbayan sa Sugbo, apil na sa Mandaue City, kay gigamit nga pasaheroan.
Sakto ang gibuhat sa CCTO nga panakpon ang mga e-trike nga naa nanagan sa main roads sa Dakbayan kay usa ni sa nakadala og kahuot sa traffic. Kalapasan usab sa balaud ang ilang pagdagan sa national roads. Busa, samtang sayo pa angay pugngan ang paggamit niini.
Hinaut unta nga di panakpon ang mga e-bicycle (e-bikes) nga nagdagan sa mga karsada nga sakyan lang og tagsa ka tawo. Gusto man gud sa Land Transportation Office (LTO) nga apilon kini sila sa pagdakop kay di rehistrado.
Sa pag-adto nako sa Guangzhou City, China, mao ni ang nagdagan dagan sa ilang mga karsada sa main city streets nga hulip sa mga scooter ug motorsiklo. Ilang gi-ban ang motorized two-wheeled nga mga sakyanan sugod sa 2007 tungod sa mga aksidente. Nitibugsok ang gidaghanon sa mga aksidente sa siyudad sukad ila ning gibuhat.
Kon mangutana ka nako kon uyon ko if ipatuman ni dinhi sa Siyudad, yes, uyon ko. Kining matanga sa sakyanan way carbon footprint. Kay di kaayo kusog modagan, mas less fatal ang kon dunay aksidente nga mahitabo.
Sa advance ug moderno kaayong lugar sama sa Guangzhou, nganong di man kini mahimo sa ordinaryong metropolis, sama sa Metro Cebu?
Lane
Gikinahanglan ang lanes alang sab niini. Sa akong naobserbahan, sa main roads nila didto, naay bicycle lanes nga subayon sa e-bikes ug mga biseklita. Respetar sila didto kay sagad sa mga sakyanan mag-amping nga di makasud. Unya, di ka makaingon nga dagko tanang karsada kay pupareho ra ang uban diri.
Ang nakalahi lang kay kadaghanan sa drivers nila disiplinado. Di sama dinhi sa Sugbo nga kadaghanan way disiplina, mga arogante ug hambog pa.
Lahi na
Kaniadto, bisan pag medyo taas na ang adlaw sa akong pagsikad, di pa maghuot ang mga sakyanan sa karsada padung sa norte sa Cebu. Sagad, kon di ko moadto sa Danao, either molahos ko sa Carmen or sa Liloan ra ko kutob.
Karon lahi na kaayo ang kahimtang sa karsada. Grabe na ang kahuot sa trapiko gikan sa national road sa Mandaue lahos na sa Consolacion ug ubang bahin sa Liloan.
Mas grabe ang Consolacion kay naa pay daghang gitugtang maka-park nga mga sakyanan sa national road. Ambot wa tingali magtagad ang local government kay naa pa man gihapon ni sila. Nakaamgo ba kaha ang LGU nga hulga ni sa kinabuhi kon ila rang pasagdan.