MAGSAYSAY, Davao del Sur -- Mokabat sa P950 mil ang kantidad sa ayudang pinansyal sa probinsyang kagamhanan ngadto sa mga opisyal ug sakop sa Saint Michael Multi-Purpose Cooperative (SMMPC) sa Barangay Kasuga ning lungsod, adlaw’ng Biyernes, Hulyo 26.
Usa ka blessing ug cutting of ribbon ceremony ang gipahigayon diin milagda sab og mga dokumento ang mga opisyal, Department of Agrarian Reform, Department of Trade and Industry, ug gobernador sa lalawigan.
Gihangop ni SMMPC manager Melquiades Balwit ang tabang sa probinsyang kagamhanan ngadto sa ilang kooperatiba nga nag-selebrar sa ika-10 anyos sa maong adlaw.
Ang kooperatiba nagapamaligya og mga pan sa ilang bakery, chorizo ug tosino diin daghan sa mga molupyo sa lungsod ang naka-benepisyo niini.
Nakita sab sa mga miyembro sa kooperatiba ang paglambo sa ilang han-ay human nakapalit na og mga kahimanan nga gamit sa ilang pagama sa ilang mga produkto.
Dako ang pasalamat sa mga sakop sa kooperatiba ngadto kang Davao del Sur Governor Douglas Cagas human nga usa sila san aka-benepisyo sa mga programa niini alang sa katawhan sa lalawigan. (Orlando B. Dinoy)