MIBUHAGAY ang nagkadaiyang reaksiyon gikan sa publiko human nga mipaguwa og mando si Presidente Rodrigo Duterte, Biyernes, Hulyo 26, nga isuspenso ang operasyon sa tanang gaming schemes ilawom sa Philippine Charity Sweepstakes Office (PCSO) tungod sa halapad nga kurapsiyon.
“I have today ordered the closure, the stoppage of all gaming schemes sa... whatever nature, however done, that got the franchises to do from the PCSO. The ground is massive corruption involving all, pati the courts who repeatedly issued injunctions to paralyze government and to allow corruption to thrive,” suma sa presidente.
Ang desisyon sa Pangulo gikakurat ug gikaitok ilabi na ngadto sa mga manaya-ay sa lotto, ug ubang paduwa sa PCSO.
Suma sa netizens nga anugon kaayo ang ilang lingaw-lingaw og taya uban sa pamasin nga modaug og ginagmay nga kantidad.
Apan kung may nasuko, duna say nalipay kay suma pa, dugay na kaayo ning korapsiyon sud sa PCSO ilabi na sa pagpadaug sa mga numero.
“Maayo rapud kay naay uban perti kaadik anang mga lasto2x. Hurot ang income. Magka utang2x pa maka patad lang,” ni DongAbby Geroy Rivera sa Facebook post sa Superbalita Davao labot sa isyu.
Segunda sab ni Francisco Fortich Rebosura, “Maayo nuon nga siradan nag pirmanente aron tabla ra tang tanan. Kapin napu ka tuig nakog tigpalit sa ilahang tiket nya wa juy daogdaog. Sa akong lantaw, Gi kulimbat ra kuartas mga tao ni ana. Maau ra kaayo nga di nana padayunon pa. Usikusik ras kwarta.”
Samtang si Enteng Canada Franca,”Maayo ra hapit na 25 years kog taya wala gyod ko kadaog!”
Moapela
Samtang Sabado, si PCSO general manager Royina Garma uban ang lain pang duha ka opisyal sa PCSO mipaambit og mensahe ngadto sa mga sumusunod sa PCSO.
“Pursuant to the order of the President, suspending PCSOs gaming activities, the PCSO Board directs compliance to said instruction until further notice,” ni Garma sa video message.
Gidugang sab sa opisyal nga moapela sila sa pangulo nga ibalik ang tanang paduwa ilawom sa PCSO alang sa interes sa ahensiya, sa mga ahente niini ug mga beneficiaries.
Dugang pa niya, “To our valued customers, please be advised that our PCSO games are suspended pursuant to the directive of President Rodrigo Roa Duterte. All players with advance play tickets are advised to keep their tickets until further notice.”
Subay sa mando sa pangulo, kagahapon ang kapulisan nagronda sa mga STl ug lotto outlets, aron isiguro nga wala na gyud kini nag-operate.
Luyo sa lotto, gimando sab ang pagpaundang sa operasyon sa Peryahan ng Bayan ug Keno.