HUMAN sa pagpadayag ni Presidente Rodrigo Roa Duterte sa iyang tinguha nga haw-ason gikan sa pagkakabus ang unom ka milyones nga mga Pilipinos sa iyang State of the Nation Address (SONA) 2019, giduso karon sa National Anti-Poverty Commission (NAPC) ang maong presidential agenda.
Si Secretary Noel Felongco, ang hepe sa NAPC, nakig-coordinate sa miaging adlaw sa Kilusang Pagbabago (KP) sa Visayas atol sa quarterly conference sa miaging grupo. Moabot og kapin sa 200 ang mga lider sa KP nga nanambong sa maong tigum.
Kining Kilusang Pagbabago mao ang grassroots movement sa mga pro-Duterte supporters. Naporma kini dinhi sa Sugbo mismo human sa eleksyon sa 2016 ug paspas nga nikatag sa tibuok nasud.
Alang sa mga sakop sa KP, sila ang grassroots partners-for-change sa presidente sa tinguha niini nga pagkab-ot sa kausaban labi na diha sa paghaw-as sa mga kabus gikan sa kalisod.
Sa miaging piliay, nitabang kini sila sa paggampanya alang sa kadaugan sa mga kandidato nga pro-Duterte sama nilang Sen. Bong Go ug Sen. Bato dela Rosa.
Atol sa iyang pakighinabi sa mga pro-Duterte supporters, si Felongco nibukhad sa plano nga mag-mobilize og mga usa ka milyon nga mga boluntaryo diha sa 42, 000 ka mga barangay sa nasud.
Mao kini ang Kasambayanihan kun ang Kaisa ng Sambayanan Laban sa Kahirapan.
Alang kanako, sakto kining direksyon karon sa administrasyon basi sa stratehiya sa NAPC.
Matod pa, kining tinguha nga mahaw-as ang moabot og unom milyones gikan sa kakabus mao ang labing lisod nga hagit alang kang Presidente Duterte.
“Poverty incidence fell from 27.6 percent in the first half of 2015 to 21 percent in the first half of 2018 (Ang insidente sa kakabus nahagbong gikan sa 27.6 porsiyente gikan sa unang katunga sa 2015 ngadto sa 21 percent),” matod niya.
“The most important number, though, is the six million Filipinos we need to pull out from poverty (Ang labing mahinungdanong numero mao ang unom ka milyones ka Pilipino nga kinahanglang mahaw-as gikan sa pagka kabus),” Dugang niya. “Kindly help me on this (Tabangi ko niini.)”
Tungod sa maong pag-awhag ni Presidente Duterte, paspas kaayung niboluntaryo ang mga sakop sa KP dinhi sa Visayas alang sa pagtabang sa NAPC nga maoy gitugyanan sa maong tahas.
Tomas
Daghan ang nagsigig panugsog kanako kabahin pagkapildi ni kanhi mayor Tomas Osmeña tungod sa akong baruganan nga may pagka pabor sa mga proyekto sama sa Bus Rapid Transit (BRT) ug kanang underpass diha sa Mambaling.
Samtang dunay nangugat gihapon nga anti-BRT, nahimuot ko nga kining bag-ong administrasyon nipabor na sa maong proyekto nga makaayo sa Sugbo.
Grabi sab nga gisaway ang proyektong Mambaling underpass. Apan karong nahuman na kini ug nakitang nakahapsay sa trapiko, nasiguro ko nga lakip sa malipayong nag-agi-agi niini mao ang mga kanhi niingon nga walay ayo ang maong proyekto. (@anol_cebu sa Twitter)