Nalzaro: Barangay elections og benefits

APIL sa gihisgutan ni Presidente Rodrigo Duterte sa iyang ika-upat nga State of the Nation Address (Sona) niadtong Lunes mao ang pag-uswag sa barangay ug Sangguniang Kabataan (SK) elections gikan sa sunod tuig ngadto na sa 2022. Buot ipasabot nga malugwayan ang termino ug pag-serbisyo sa mga kasamtangang barangay ug SK officials balig tulo ka tuig. Dakog ngisi karon ang incumbent officials. Samtang nagmagul-anon ang mga aspiradong mokandidato.

Hinuon, nagkinahanglan pa kini og balaod. Dali ra hinuon ang pagpasar nga mag-uktaba sa eleksiyon kay mao may kagustuhan sa Presidente. Gani sila si Senador Imee Marcos ug Bong Go misang-at naman og balaodnon nga mag-uktaba sa eleksiyon. Ang ilang mga rason kay aron kahatagan og kahigayonan nga maka-pangandam ang Commission on Elections (Comelec) sa listahan sa mga botante ug kahatagan og kahigayonan ang mga bag-ong botante nga makasalmot sa eleksiyon.

Taas na kaayo ang tulo ka tuig nga extension alang sa bati ug walay maayong performance nga mga opisyal. Apan mubo ra usab hinoon kining tulo ka tuig alang sa mga maayo’g performance. Pero wala tay mahimo gumikan kay mao may pagbuot sa Presidente.

Benepisyo

Lain nag-ong-ong nga balaudnon karon alang sa mga barangay officials mao ang dugang mga benepisyo nga ihatag ngadto kanila. Si Senador Juan Edgardo Angara ang nangamahan sa maong balaudnon. Sa iyang Senate Bill No. 136 mag-regular sa mga barangay officials ug pahatagan og tukmang suweldo, medical insurance ug ipasakop sa Government Service Insurance System (GSIS) sama sa ubang nga regular government employees.

Sa pagkakaron, honorarium lang ang gidawat sa barangay officials base sa income sa barangay. Apan kon mapasar ang balaudnon ni Angara, tiaw ba nimo kanang ang kapitan makadawat na og sama sa suweldo sa city o municipal councilors. Samtang ang barangay councilors makadawat og 80 per cent sa suweldo sa city o municipal councilors. Pero wala gibutang sa balaod ni Angara kon asa kuhaon ang kuwarta nga i-suweldo. Kon kuhaon sa barangay funds, hurot ilang pundo. Ambot kon mapasar ba usab kaha kini? (bobbygnalzaro@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph