GIPAHIMANGNOAN sa City Traffic Management System (CTMS) sa Dakbayan sa Lapu-Lapu ang mga motorista, labi na ang mga dumuduong, nga adunay ipatumang re-routing ug pagsirado sa kadalanan sa dakbayan sa Agusto 11, Dominggo.
Sa maong adlaw ipahigayon sa dakbayan ang international triathlon Ironman 70.3 nga salmotan sa mga tri-athlete.
Ang apektado sa pagsira mao ang kadalanan sa Brgy. Punta Enģaño, Mactan, Buaya, Ibo ug Pusok, nga maagian sa mga atleta.
Gikatakdang sirad-an sa motorista ang dalan gikan sa Punta Engaño, (Kabsesan Tasyo Road) paingon sa Manuel L Quezon Highway hangtod sa junction sa Marcelo Fernan Bridge.
Sirad-an usab ang dalan atubangan sa Gold Berry Hotel sa Brgy. Pusok paingon sa Brgy. Punta Engaño sa alas 4 pa lang sa kadlawon nianang Agusto 11 ug buksan sa alas 2 na sa hapon.
Alas 5 na sa hapon maablihan pagbalik ang dalan nga sirad-an sa Brgy. Punta Engaño.
Giawhag sa CTMS ang mga guest sa mga hotel ug resort nga naa sa rota sa pagbiya og sayo sa ilang gi -estaran aron di malangay sa ilang tagsa-tagsa ka mga flight o laing mga lakaw.
Mahimo silang makaagi sa alternate route nga gitagana sa CTMS nga mao ang dalan paingon sa Marigondon ug lahos na sa Basak Road gikan sa Mactan.
Ang mga motorista gikan sa Mactan, Maribago, Marigondon, Cordova ug Basak nga adto paingon sa airport mahimong maakaagi sa Sangi-Matumbo Road o ba kaha sa Maximo Patalinghug Avenue sa Pajo o ML Quezon Nat’l Highway sa Pusok.
Ang tanang trucks, trailer, tourist bus o ubang sakyanang adunay gross vehicle weight nga 4500 pataas di tugotan nga makabiyahe o makaagi sa gamitong dalan sa kompetisyon. (GCM)