KATAPUSANG napalgan nga gi-salvaged nga lalake sa Siyudad sa Talisay nga si Jerh Sigue ang giila sa kapulisan sa Talisay City Police Station nga maoy posibleng likud sa pagpatay sa unang duha ka gipang-salvaged nga mga lalake.
Gitug-an ni Police major Orlando Carag Jr., hepe sa Talisay City Police Station, nga sa pagpalawom nila sa pakisusi, ilang nasubay nga si Sigue ang nakuha sa closed-circuit television (CCTV) nga maoy nipusil sa laing giila nga durugista nga si Jeber Jerusalem.
Si Jerusalem gipusil patay sa gawas sa Manora Apartelle sa Barangay Cansojong, Siyudad sa Talisay, alas 10 sa gabii niadtong Hulyo 12.
Ang babaye nga nakuha usab sa CCTV ang giilang kapuyo ni Sigue nga naila sa ngalan nga Divine. Si Divine ang giingong nitudlo una kang Jerusalem una gipusil ni Sigue.
Dugang ni Carag nga si Divine ang kanhi uyab sa drug lord nga si Steve Go, kinsa napatay sulod sa Mandaue City jail.
Si Divine ang nahimo usab nga kapuyo sa nipuli kang Go nga si Girlie Luage, kinsa napatay usab sa operasyon sa Provincial Intelligence Branch niadtong Abril 29 ning tuiga.
Giingon nga si Sigue ang nahimo na usab nga kapuyo ni Divine human namatay si Luage.
Samtang ang duha ka unang gi-salvage nga sila si Renante Otero, kinsa gibitay nga patay na sa taytayan sa barangay San Isidro, Hulyo 22, ug Jimbo Gadiano, napalgan nga patay tungod sa mga samad punusilan niadtong Hulyo 25, giingong mga tawo kaniadto ni Luage.
Gani si Gadiano ang gihulagway nga sinaligan sa kanhi drug lord.
Matod ni Carag nga posibleng adunay nahitabong bangi sa ilang grupo tungod sa wala pag-remit sa mga halin o nag-unay na human napagya ang ilang grupo.
Samtang ilang gitan-aw karon kon kabanay o mga suod nga kauban sa grupo nila Jerusalem, Otero ug Gadiano ang nihimo usab sa pagpatay ug paggaid ni Sigue sa poste ug gipusil ika-napulo ka higayon, niadtong Byernes sa kaadlawon, Hulyo 26.
Lakip sa ilang gisubay kon ang gipangita nila nga si Divine, kinsa ginganlan na nga ‘drug queen’ mao ba ang Divine Grace Dandan, kinsa nasikop sa kapulisan sa PIB, niadtong Huwebes, alas 6:15 sa buntag, Hulyo 25.
Si Dandan nasikop sa Barangay Upper Linao, Talisay City ug nakuhaan og shabu nga mobalor og P68,000. (FMD)