NAGPLANO si Joavan Fernandez sa paghimog legal nga lakang batok sa usa ka security guard sa condominium nga nanawag og pulis sa miaging gabii ug giparekisa siya human mamugos sa pagsud usa ka unit nga gibantayan niini.

Ang tawag sa sikyu maoy nakaaghat sa pagpadala sa kapulisan sa Special Weapons and Tactics (Swat) ngadto sa condominium.

For updates from around the country, follow Sun.Star on Twitter

Si PRO-7 Director Lani-o Nerez nakadayeg sa sikyu ug mga pulis.

Si Fernandez uban sa iyang lima ka mga higala ningsakay sa usa ka grey nga Fortuner nga way plaka ang luyo ug apan adunay karton nga gisuwatan sa pentel pen ang atubangan sa sakyanan sa iyang pag-report sa Fuente police pasado alas 6 kagahapon sa buntag.

Matod ni Joavan ngadto kang SPO1 Agustin Collano nga samtang nagsaulog sa iyang adlawng natawhan sulod sa usa ka lawak sa condominium, niabot ang mga gwardya nga sila si Dennis Tunacao ug Nestor Gingoyon, pasado alas 8 sa milabay nga gabii.

Gusto sa mga security guard nga nadestino sa Indiana Condotel nga sila pakanaugon ug gihulga sila nga pagngan og suga sulod sa lawak.

Nahibulong na lang si Joavan nga nangabot ang armadong mga sakop sa Swat ug gipangrekisa silang tanan.

Uban ni Joavan niadtong higayona ang usa ka bata, duha ka mga babaye ug duha ka laing mga lalake. Apan wa ilakip sa pagreklamo ni Joavan ang mga sakop sa Swat nga niresponde sa alarma.

Si Tunacao mitawag sa kapolisan sa Fuente nga nipahibawo nga anaa si Fernandez sa condominium.

Kini nipahibawo nga siya armado og armalite, naalarma sa Mobile Patrol Division ug gipadad-an og tulo ka mga sakyanan ang dapit.

Apan sa pagrekisa sa kapulisan, wa silay nakuhang armas gikan kang Joavan uban sa iyang mga kauban nga nag-ukopar sa sa condominium unit.

Si Gingoyon nga nahinabi sa Sun.Star Superbalita niingon nga niabot si Joavan sakay sa usa ka puti nga sakyanan nga may plate number SFR-595 ug lain pang sakyanan.

Nisud kini sa unit nga may dala nga lechon ug kinahon nga beer ug softdrink ug mosulod sa lawak nga gipanag-iya ni Elvira Quimora, apan ilang gipugngan kay wa diha ang tag-iya sa lawak. (JFT/DRT)