HUMAN sa kamandoan nga gipagawas ni President Rodrigo Duterte sa pagsuspenso sa operasyon sa tanang legal nga sugal nga gihatagan og pagtugot sa Philippine Charity Sweepstakes Office (PCSO), milihok dayon ang kapulisan sa Central Visayas.
Si Police Brigadier General Debold Sinas nimando sa tanang city ug provincial police office directors sa pagsira sa tanang outlet sa lotto, swertres, small town lottery (STL), Piryahan ng Bayan, Keno ug uban pang matang sa sugal.
Way pasayluon, matod sa heneral, sanglit mao kini ang mando sa Presidente.
Giklaro ni Sinas nga kon aduna pay mo operate nga sugal sama sa small town lottery ug uban pang illegal numbers game ,ila kining dakpon ug ibalhog sa mga prisento sa kapulisan.
Ang mga manugal gipasidan-an nang daan sa kapulisan nga mahimong mapasaylo sa unang kalapasan sugod sa Hulyo 27, Sabado.
“Sugod ganina nag pagawas namig order sa tanan nga i-implement, kanang naay mga booth ipa close kay kon naay magbaligya, pangdakpon. We have already instructed our people to do this, short notice pero that is the directive,” matod ni Sinas.
Lakip sa iyang gipasirad-an ang mga outlet sulod sa malls sa siyudad sa Sugbo ug mga silingang siyudad. Wa pay udto, nanglibot na ang kapulisan aron pagsirado sa tanang outlets nga dunay pagtugot sa PCSO.
Giangkon sa director nga naka benipisyo ang kapulisan sa kita sa STL sanglit adunay bahin sa kita ang kapulisan.
Apan wa silay mahimo niini tungod kay maoy mando sa ilang labaw.
Gisalikway hinuon niya nga mosiaw ang ubang matang sa sugal sama sa masiao sanglit hutdon nila kini sa pagdakop.
Gihatagan niyag 12 oras nga tagal ang kapulisan nga mohimo niini ug kinahanglan nga mo report sila sa resulta sa ilang pagtuman sa kamandoan sa Presidente.
Si Police Colonel Gemma Vinluan, direktor sa Cebu City Police Office, nimando sa iyang mga station commander nga hingusgan ang kampanya batok sa sugal. Naa sa siyudad sa Sugbo ang daghang outlet sa swertres ug STL hinungdan nga iyang gipa monitor.
Bahad ni Vinluan sa mga nag operate sa bisan unsa nga gambling nga kon di motuman, ikiha.
“Pag sila ay nagkaroon ng resistance, lagyan namin sila ng kaso na appropriate para sa kanilang offense,” matod ni Vinluan.
Mohangyo
Si PCSO General Manager Royina Garma, sa video nga iyang gipasupot sa social media, niingon nga ilang tumanon ang kamandoan sa Presidente pag sirado sa tanan nilang outlet.
Apan iyang gipaniguro nga moapilar sila ngadto kang Duterte nga ibalik ang tanang pasugalan nga adunay permiso sa PCSO.
“The PCSO board directs compliance to said instruction until further notice. Rest assured that PCSO shall appeal to the office of the President for the resumption of the conduct of all games to PCSO’s mandate and for the interests of the PCSO, its agents and beneficiaries,” matod ni Garma.
Giawhag usab niya ang mga kustomer nga nakakuhag advance play tickets nga tipigan lang una kini ug paaboton ang laing pahibawo sa ahensya.
Usa sa mga operator sa STL nga nahimutang sa sitio Fatima, Barangay Apas, Siyudad sa Sugbo nga di magpahingalan, nagkanayon nga ilang tumanon ang mando sa Presidente.
Apan nanghinaot siya nga ma resulbar ug mabalik na sa labing dali nga panahon ang ilang operation sanglit daghan ang maapektohan niini.
“Maayo lang untag mabalik lang ang STL, Sir oy. Daghan baya naguol apil ko kay diri baya mi magkuha sa among gasto sa balay,” matod ni alyas Inday.
Si Marcelo, manayaay sa swertres nga makadaghan na makadaog, nakapangutana usab nganong gipasira ni Duterte ang swertres nga kalingawan man kini sa mga tiguwang sama niya.
Duha ka semana ang nakalabay nakadaog siyag P38,000 nga nakaikag niya nga mopadayon sa pag palit og swertres.
“Paita ana, Dong oy, mao na lang gani ni among kalingawan, undangon pa gyud,” matod ni Marcelo.
Kurapsyon
Si Duterte nimando sa tanang duwa sa PCSO tungod sa “massive” corruption sa ahensya.
Iyang giluwatan ang direktiba sa video message nga gi-upload sa Facebook page sa Presidential Communications Operations Office sa dayong alas 11 sa gabii, Biyernes, Hulyo 26.
“I have today ordered the closure, the stoppage of all gaming schemes of whatever nature, however done, that got their franchises to do so from the PCSO,” matod ni Duterte sa iyang special message,
“The ground is massive corruption involving all [gaming activities], pati (and even) the courts [that] repeatedly issued injunctions to paralyze government and to allow corruption to thrive,” dugang niya.
Matod sa Presidente nga ang iyang direktiba nagsugod sa Biyernes.
“Pending investigation, lahat ho ng laro ng lotto, STL, Peryahan ng Bayan or whatever nature. There’s one, ‘yung gambling machine, Keno. I said all gaming activities, ‘yung gambling that got their franchise from government through PCSO are as of today suspended or terminated because of massive corruption. Wala ako magawa (I have no choice). I have to do it,” siya nagkanayon.
Matod niya nga di siya makatugot nga dunay manikas ug mahikawan ang nasod sa kwarta nga iyaha unta. Nihatag si Duterte og 24-oras nga deadline sa pagtangtang sa tanan gaming ug gambling materials sa PCSO sa pampublikong lugar.
Iyang gimandoan sila si Philippine National Police chief General Oscar Albayalde ug Armed Forces of the Philippines Chief-of-Staff Benjamin Madrigal Jr. sa pagseguro nga matuman ang iyang mando.
“I will give them 24 hours to remove them from the public places. Tomorrow, beginning tomorrow (Hulyo 27), at sunrise everything, all transactions and gaming, wager of bets becomes illegal,” matod ni Duterte. (AYB, Sunstar Philippines)