LAIN na usab nga langyaw ang nisuway sa pagpakamatay pinaagi sa pagdunggab sa iyang kaugalingon ug nanirado sa kwarto human sila mag-away sa iyang asawa.

Apan naluwas siya kay nangayo siyag panabang tungod kay wa na niya maaguwanta ang kasakit sa iyang tiyan nga dunay dakong samad.

For updates from around the country, follow Sun.Star on Twitter

Kini nahitabo sa usa ka unit sa Windland Tower, sa dalan Escario, pasado ala una kagahapon sa kaadlawon.

Ang samdan sa tiyan giilang mao si Lim Kyung Taek, 52.

Sa pasiuna nga imbestigasyon nga gihimo nila ni SPO4 Alex Dacua, PO3 Edario Manatad, PO2 Jodan Batucan ug PO2 Julius Reges sa Homicide Section sa Cebu City Police Office (CCPO) nagbutyag nga nag-away ang magtiayon tungod sa personal nga rason.

Wa kini nila ibutyag.

Gipagawas sa lalake ang iyang asawa ug nanirado sulod sa lawak.

Paglabay sa pipila ka mga oras nangabli sa lawak ang Koreano nga samaron na sa iyang tiyan.

Sa pagkakita sa Koreana nga samdan ang iyang bana ug nangayog panabang kaniya, nagpakitabang ang asawa.

Ang ilang mga silingan sa laing mga condominium unit ningdala kang Taek sa usa ka pribado nga tambalanan.

Naglisod sa pag-imbestigar ang kapulisan kay ang magtiayon halos di makamao sa pinulongan nga English.

Daghang mga Koreano ang nia sa Sugbo nagtungha og English.

Duna say uban kanila nga nia nagnegusyo alang lang sa mga Koreano nga turista samtang ang uban nipili nga mag-Filipino citizen.