NAKURATAN ang katawhan daw sa dili makatuo sa dihang gimandoan sa atong Presidente Rodrigo Duterte ang mga kapolisan nga hunungon ang operasyon sa Lotto nationwide, tungod daw matud pa niya dunay “massive corruption” sa Philippine Charity Sweepstake Office (PCSO).
Tanan nga nagdala sa prangkisa niini, peryahan ng Bayan, Small Town Lottery (STL, gipahunong usab ang operasyon, wala kaayo niya gi-elaborate kung unsang matang sa kurapsiyon, apan, bilyon bilyon daw ang nawala gikan sa maong pagpadagan.
Abi nato og natarong na ang operasyon sa PCSO sa dihang gilisdan niya si General Balutan nga napuno usab sa kurapsyon.
Karon nga gidumala na ni Police Colonel Royina Garma nga miritero og sayo sa PNP ug maoy nagdumala sa PCSO, pero gipahunong naman hinuon ang operasyon?
Daghan ang apektado sa kalit nga pagtak-op sa operasyon sa lotto. Una, mga pobre ngaa pasyente sa nagkadaiyang ospital sa gobeyrno lukop nasud ug tungod kay charitable institution ang PCSO, dinhi usab gikuha ang tabang sa mga biktima sa kalamidad nga mahitabo sa atong nasud matag karon ug unya.
Ikaduha, asa paingon ang libo-libo ka mga empleyado niini, nga mawad-an og trabaho tungod kay ang ilang sweldo diha man gikuha sulod sa operasyon sa PCSO?
Bilib kita sa kampanya sa administrasyon sa atong halandong presidente, ang pagsumpo sa kurapsyon ug droga, apan tungod kay kultura na sa dugo nga Pilipino ang pagka-kurap, matapos nalang ang iyang termino di ug di gyud mawala ang kurapsyon sa nasud.
Kalit nga desisyon damay ang tanan, unta, gihunahuna sa atong presidente nga kung kinsa man ang kurap sa maong ahensiya, siya ang sentrohon sa pagtangtang og dili ihunong ang tibuok operasyon, tungod kay makulob ang kaldero sa mga ultimong mga empleyado.
Ang iyang kampanya motaas ang gidaghanon sa mga tawo nga walay trabaho sa atong nasud, ug niining hitaboa misamot gayod kataas ang ihap baliktad kini sa tumong sa iyang administrasyon.
Kung adunay duha o tulo ka general nga scalawags sa atong kapulisan, di tingali nimo ipahunong ang operasyon sa kapolisan sa tibuok nasud.
Kung dunay pipila ka kurap sulod sa Department of Education (DepEd) tingali di puwede nga ipahunong ang operasyon sa tibuok departamento kay madamay ang walay labot nga seryusong nag-serbisyo.
Manghinaut kita nga sa di madugay mahibalik ang operasyon sa PCSO pero, kung kaya man sa atong gobyerno nga mahatagan og trabaho ang liboan ka mga empleyado niini, mas maayo nga di na mag-promote og sugal ang atong kagamhanan puslan man. Isip-isip daw og maayo ba kini o dili?