KIDAPAWAN CITY - Girakrakan sa mga armadong grupo ang kampo sa Citizen Armed Forces Geographical Unit (Cafgu) alas 10:20 sa gabii niadtong Sabado, Hulyo 27, sa probinsiya sa Cotabato.
Sa taho gikan sa kuwerpo sa kapulisan sa Cotabato nga gipabuthan sa mga miyembro sa New People's Army (NPA) ang detachment sa Cafgu sa bukiron nga parte sa utlanan sa Banisilan, North Cotabato ug Wao, Lanao del Sur.
Abtik nga nakabantay ang mga sakop sa para-military troopers nga mibalos ngadto sa mga rebelde.
Milungtad sa 25-minutos ang sinukliay og mga bala tali sa duha ka pundok gamit ang mga tag-as nga matang sa armas.
Nakugang ang mga sibilyan sa mga buto-buto sa armas hinungdan nga sila nanghapa sulod sa ilang mga balay sa kabalaka nga maigo sa mga saag nga bala.
Miatras ang mga NPA sa diha nga nakatimaho sila nga nagsingabot ang mga sundalo nga miabag sa mga Cafgu.
Walay naangol sa mga Cafgu samtang dili matino sa mga NPA nga padayon nga gilutos sa puwersa sa kagamhanan. Edgar Fuerzas