MISAKA pa ang ihap sa mga nagkasakit sa dengue sa North Cotabato.
Sa tibuok North Cotabato, sugod Enero hangtud sa kasamtangan, muabot na sa 3,411 ang nagka-dengue nga nadala sa balay tambalanan ug 16 na ang ihap sa nangamatay.
Sa talaan sa Kidapawan City Health Office, muabot sa 452 ang dengue cases sugod sa bulan sa Enero hangtud sa kasamtangan.
Mas taas kung itandi sa susama nga bulan niadtong tuig 2018 nga dunay 72 ka tawo ang nagkasakit og dengue.
Ang rekord naggikan sa nagkadaiyang balay tambalanan sa Kidapawan City nga dunay mga pasyente nga nadala gumikan sa dengue.
Nahibaw-an nga sa tibuok probinsiya sa Cotabato, ang Kidapawan City ang daghang nagkasakit og dengue sa pinakaulahing datos sa Department of Health (DOH-12).
Gi-aghat sa Department of Health (DOH-12) ang publiko nga manghinlo o sundon ang 4’clock habit aron kapugngan ang pagtaas sa ihap sa mga nagkasakit og nangamatay sa dengue. Edgar Fuerzas