DIGOS CITY - Mipatim-aw ang labaw sa tanang agent sa Rigen Wellness 2.0 aron klarohon sa ilang mga investors nga wa silay gikuptan nga bisan usa ka sentimo sa koleksyon sa gikan sa mga mamumuhunan.
Miatubang sa pipila ka mga tigbalita si Bernard Gortina, ang kanhi presidente sa St. Benedict Hospital ug agent sa Rigen Matanao Branch niadtong Sabado sa hapon, Hulyo 27, aron klarohon nga gi-remit nila sa central office didto sa Tagum City ang tanang koleksyon.
“Wala ko misibat. Wala ko’y rason nga motago kay wala ko’y bisan usa ka sentimo nga gigunitan nga kwarta,” asoy ni Gortina.
Gipakita sab niini ang mga dokumento sa ilang transmittal sa koleksyon nga nadawat sab sa central office.
“Ang akoa lang klarohon nga dapat dili ako ang i-blame sa mga investors kay biktima sab ko diri,” sulti niya.
Matod ni Gortina nga angayan nga tumanon ni Paul Auditor ang saad nga iuli ang kwarta sa tanang investors aron masulbad na ang suliran.
Nasayran nga giuwan og batikos sa mga netizens nga investors ang Rigen Matanao pinaagi sa Facebook human nga taud-taod na silang nagpaabot nga mauli ang ilang kwarta.
Apan, subay sa pahayag sa central office sa ilang official facebook page gikanayon nga sa Agosto 15 na mauli ang kwarta sa tanang investors.
“Ang Rigen Wellness 2.0 kay magpahigayon ug Refund Schedule karong August 15, 2019. Ayaw mo padala sa mga impormasyon nga ginapasa karon sa social media nga ang refund kay naay 20%-30% nga kaltas tungod kay dili kini tinuod,” asoy sa pahayag sa Rigen.
Dugang sa pahayag, “We badly need everyone's cooperation for this to be successful. Refund flow chart will be posted tonight including the process of verification. Thank you.”
Kagahapon nanggawas sa social media ang video nga gipangransak sa mga investors ang mga buhatan sa Rigen sa Tagum City ug gipangkuha ang mga gamit sud sa balay.
Kahinumdoman, nga sa miaging mga adlaw, gipangguba sab sa mga investors ang propedad sa kanhi CEO sa Rigen nga si John Rigen Garcia sa Tagum City.