DILI tiaw ang pagpangandam nga gihimo sa Kapitolyo Probinsyal labina ang buhatan sa Provincial Tourism Office sa pag-abot ni Ms. Philippines Air 2019 Ana Monica Tan sa lalawigan sa Misamis Oriental Lunes, Hulyo 29, 2019.
Si Jeffrey Saclot maoy nagpreparar sa mga kalihukan kon asa bongga ang himoun nga aktibidades alang kang Tan nga garbo sa lungsod sa Tagoloan.
Gilauman nga si Misamis Oriental Governor Bambi Emano mohatag og pasidungog kang Tan pinaagi sa paghatag og plaque of appreciation.
Gipahibalo ni Saclot nga human sa flag-raising rites, adunay motorkada nga himoun palibot sa Siyudad sa Cagayan de Oro. Nakaplastar na usab ang mga dagkong tarpaulin niini diha sa mga billboard.
Human sa motorkada, gitakdang moatubang si Tan sa mga sakop sa media, aron usab sa pagpahayag sa iyang pasalamat ug pagpaambit sa iyang kasinatian ibabaw sa stage sa gipahigayon nga Miss Philippines Earth 2019 didto sa Okada Hotel sa Manila.