GIKUMPISKA sa tinugyanan sa Bureau of Fire and Protection (BFP) ang mga butane canister ug tangke sa liquefied petroleum gas (LPG) atol sa operasiyon niadtong Hulyo 25 sa Barangay Canitoan ug Barangay Bulua Siyudad sa Cagayan de Oro.
Moabot ngadto sa 21 ka butane canister, upat ka basiyo ug 17 ang gipun-an gamit ang LPG gikan sa Pomicmic Store diha sa Zone 3, Calaanan, Canitoan, 10 canister nga gipun-an og LPG gikan sa JM Store sa Zone 1, Canitoan, 168 basiyo sa canisters, 72 canister nga gipun-an og LPG ug duha ka 50 kilo sa LPG nga tangke, usa ka digital weighing scale, calculator sa bodega sa Hillside, Pagatpat, laing pito ka canisters nga puno sa LPG, 451 basiyo sa canister gikan sa Paho Store sa Zone 7, Barangay Bulua, lima ka portable stove, duha ka tangke sa 50 kilo nga LPG, 354 butane canister, 90 ka basiyo ug 254 nga puno sa LPG gikan sa Barangay Canitoan.
Nasayran nga gikumpiska ang maong butang human nga walay napakitang mga dokumento ang mga nanag-iya niini.
Nipahimangno ang tinugyanan sa BFP nga unta dili kini gamiton sa sulod sa panimalay tungod kay gidesinyo kini alang sa mga camping ug mga gawas lamang.
Kahinumdoman nga dunay natigayong sunog sa siyudad diin dunay patay tungod sa giingong butane canister.