PATAY ang dose anyos nga bata human nalatayan sa trailer truck sa niaging adlaw sa Barangay Sugbongcogon, lungsod sa Tagoloan, Misamis Oriental.
Giila ang biktima nga si Maria Lourdes Acazo, tinun-an sa Grade 7 sa Tagoloan National High School.
Ang driver sa trailer truck wala kamatikod sa incident. Hinuon nakig-areglo kini sa pamilya pinaagi sa pag-abaga sa tanan nga galastuhon.
Apan ang higala sa biktima nasakit ug naguol sa panghitabo gumikan kay siya ang napasanginlan nga iyang gitulod.
Matud pa niini, kuyog sila pagpauli sa biktima niadtong tungora gikan sa tunghaan dihang nasudlan og bato ang sapatos ni Acazo ug iya kining gikuha niini. Daw nasangit ang bag ni Acaso sa trailer nga nakalarga na hinungdan sa pagkaligid niini ug pagkaligsan sa biktima.
Giklaro sa pamilya sa higala sa biktima sa SunStar Superbalita nga dili katulog ang ilang anak sa maong pasangil.
Mi-apelar ang pamilya niini nga unta mahunong na ang pagpanumangil ug pagbasol kaniya tungod kay giingong dili kini tinuod nga sila nagtinukloray sa dalan. Gani iyang sobrang gikasakit ang pagkamatay sa iyang suod nga higala.
Sa pagkakaron gipaubos kini og counseling sa Department of Social Welfare and Development tungod sa trauma nga nasinati niini dihang nasaksihan ang panghitabo ug dili na kini halos mogawas sa ilang balay.
Samtang ang biktima gihaya na sa ilang puloy-anan.