NAPILI si cycling chief ug Cavite 7th district Rep. Abraham “Bambol” Tolentino isip bag-ong presidente sa Philippine Olympic Committee (POC) President.
Nalupig ni Tolentino si Philip Ella ‘Popoy’ Juico, 24-20, sa special elections nga gipahigayon kagahapon.
Ang botasyon gilangkuban og 43 mga representante sa nagkadaiyang National Sports Associations sa nasod, duha sa ka mga atleta nga sila si Hidilyn Diaz ug Henry Dagmil ug International Olympic Committee representative Mikee Cojuangco-Jaworski.
Wala moapil sa botasyon ang Philippine Rugby Football Union.
Ang runningmate ni Juico nga si Steve Hontiveros maoy midaog isip POC chairman.
Nangapili sab sila si Jesus Clint Aranas sa World Archery Philippines ug Cynthia Carrion sa Gymnastics Association of the Philippines isip POC Board members.
Ang pagkapinili ni Tolentino maoy resulta sa dinaliang election nga gipahigayon sa POC human sa kalit lang misumiter sa iyang irrevocable resignation ang kanhi presidente sa asosasyon nga si Ricky Vargas niadtong Hunyo 17.
Sa iyang suwat, gipasabot ni Vargas nga gusto niyang hatagan kadtong mga sports leaders nga adunay igong panahon ug nga makagiya sa POC.
Si Vargas, president sa Association of Boxing Alliances in the Philippines, nakalingkod pagka-POC presidented sulod sa usa ka tuig ug tunga human siya mapili niadtong Pebrero 2018 diin iyang napalagpot si Jose "Peping" Cojuangco, kinsa miabot og 12 ka tuig sa puwesto.
Ang kalit nga pagluwat ni Vargas iyang gihimo unom ka buwan sa dili pa mo-host ang Pilipinas sa Southeast Asean Games (SEAG) nga sugdan karong Nobiyembre. (ESL)