Nadela: CCTV cam pag-monitor sa paglabay og basura

NAGBAHA ang mga pagdayeg sa social media alang niadtong mga sakop sa Department of Public Services (DPS) nga naglimpiyo sa kasapaan sa dakbayan. Taliwala sa ka lang-og sa tubig nga namuwak sa daghang basura, ila kining giubog. Tonelada nga basura ang ilang nahaw-as.

Padayon ang trabaho og wa pay nasayod hangtod kanus-a matapos kining kalbaryo sa basura nga gipas-an sa atong kasapaan. Atong panghinaot nga ang sakrapisyo nga giantos sa taga DPS mamunga og dakong pagpakabana sa publiko nga di pa uwahi ang tanan kong gusto kitang mahibalik sa karaang panagway ang atong kasapaan. Ang sulti sa mga karaan sa maong mga sapa sila maglangoy langoy tungud sa katin-aw. Mahibalik pa kaha ni? Sa pikas nga bahin dunay naghisgut nga angayan lang hatagan og pahalipay ang taga DPS nga apil sa clean up drive. May naghisgut og bunos og uban pang insintibo. Naa ra kana ni Mayor Edgar Labella ang tanan. Para nako angayan lang.

Unya mosugyot ta sa taga City Health Department pagpakig-alayon sa mga nihumol sa tubig pagsusi sa ilang panglawas. Wa bay problema sa ilang pamanit og ubang komplikasyon nga namugna sa ilang gibuhat.

Manghinaot ta nga way kakulian sa panglawas ang ilang nasugatan. Unya sa mga tiglabay og basura sa atong kasapaan, hinuktuki ninyp og maayo ang inyong gibuhat. Daghan ang napuwerhisyo. Mousab pa mo? CCTV camera ang angay nga ipangtaud sa mga barangay sa ilang mga sapa.

Gihimo na ni sa taga Barangay Canduman sa ciudad sa Mandaue og epektibo kaayo. Daghan ang gipatawag sa barangay kay di man mamakak ang camera kinsa kadtong manglabay og basura.

Ang camera motug-an sab kinsa kadtong maghimo og krimen nga moagi sa kasapaan. Apil na kadtong manuyopay sa ilawom sa mga tulay. Di ba may record man ang mga pulis kong asa ning mga tulay nga gihimong suyopanan ang ilawom. Gipakoral man gani ni Lt. Col. Wildemar Tiu ang ilawom sa tulay sa Mabolo kaniadto tungod kay gihimong suyopanan og rugby sa mga batan-on.

***

Mga pahalipay alang kang Rev. Fr. Tony Mansueto alang sa iyang bag-ong assignment isip Kura Paruko sa San Narcido Parish sa lungsod sa Consolacion sugod karong adlawa.

Isip aktibong miyembro sa among grupo nga Brotherhood of Service & Solidarity (BOSS) di na nako maihap ang feeding programs nga iyang gipasiugdahan. Naila si Fr. Tony sa pagkamatinabangon sa mga kabus, suwerte sa bag-ong assignment.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph