MAS DAKO ka pag tsansa nga maigo sa kilat og kaduha kay sa makaigo ka sa jackpot sa lotto. Porbida, duna ra bay bayongbayong nga gikilatan ug napatay niadtong Sabado didto sa Cabadiangan, Compostela. Tan-awa lang, sa 6/49 lotto, ang probability sa pagdaog one in 13,983,816, samtang sa 6/55 lotto, one in 28,989,675.
Gipahunong ni Presidente Rodrigo Duterte sugod niadtong Sabado ang tanang gaming activities sa Philippine Charity Sweepstakes Office (PCSO). Naglakip kini sa lotto 6/42, 6/45, 6/49, 6/55 ug 6/58, swertres ug Small Town Lottery (STL).
Kon mopalit kag lotto, wa kay transang makadaog. Karon nga gipahunong ang lotto, nawagtang na ang imong pagka way tsansa nga makadaog. Pero di gihapon ka makadaog kay wa na may lotto. Ang nakaayo lang, kay di na ka mapildi.
***
Ang pangulo niingon nga iyang gipahunong ang tanang gaming acitivities sa PCSO tungod sa “massive corruption” sa maong ahensiya nga gipangulohan ni kanhi Cebu City police chief Royina Garma nga niasumer niadtong miaging semana.
Ang mga gaming activities sa PCSO gihimong legal sa Republic Act 1169 ug gitumong sa pagwagtang sa mga illegal numbers game sama sa jueteng sa Luzon. Pero ang resulta sa swertres maoy gibasihan sa laing illegal numbers game.
Si Justice Secretary Menardo Guevarra namahayag nga ang mando sa pangulo hayan nga usa lang ka “temporary suspension.” Kadtong gihilantan kay wa nay lotto mahuwasan kon mahibalik na kini.
***
Sa miaging tuig, ang PCSO nikita og mokabat sa P64 bilyones. Sumala sa balaod, 55 porsento sa kita sa PCSO gigahin alang sa mga premyo, 30 porsento alang sa charity ug 15 porsento alang sa ilang operasyon.
Ang PCSO usa usab sa mga gitumbok nga tinubdan sa P165 bilyones nga gikinahanglan sa pagpatuman sa universal health care (UHC) program. Kon mahibalik ang lotto, bahala nag di ka makadaog, igo na nga nasayod ka nga makatabang ka sa panglawas sa mga kabus. 'Kon makaigo sa jackpot, piti.'